Azərbaycan Dillər Universiteti Təhsil fakültəsinin təşkilatçılığı ilə Psixologiya və Pedaqogika kafedrasının müəllimi Məmmədova Ayşən tərəfindən Korreksiyaedici təlim ixtisası üzrə təhsil alan IV kurs tələbələri üçün autizmli gənclərin sosiallaşması, cəmiyyətə inteqrasiyası və məşğulluğu mövzusunda dərs keçirilib.
“Tehsil365” bildirir ki, təlim fəaliyyətinin dərsin mövzusuna uyğun olaraq real iş mühitində təşkili tələbələrə autizmli gənclərin əmək fəaliyyətini yaxından müşahidə etmək, inklüziv məşğulluq modelinin praktik tətbiqi ilə tanış olmaq imkanı yaradıb.
Dərs zamanı müəllim autizm spektr pozuntusu olan gənclərin sosiallaşma prosesində qarşılaşdıqları çətinliklərdən, cəmiyyətə inteqrasiyanın mərhələlərindən və onların əmək bazarına hazırlanmasının vacibliyindən geniş bəhs edib. Qeyd olunub ki, autizmli gənclərin məşğulluğu onların müstəqil həyat bacarıqlarının inkişafına, özünəinamın artmasına və cəmiyyətin aktiv üzvü kimi formalaşmasına mühüm töhfə verir.
Ayşən Məmmədova çıxışında həmçinin dəstəkli məşğulluq modeli, fərdi bacarıqlara əsaslanan peşə yönümü və iş mühitinin uyğunlaşdırılması kimi yanaşmaların autizmli gənclərin iş həyatına uğurlu inteqrasiyasında əsas rol oynadığını vurğulayıb.
Dərsin müzakirə hissəsində tələbələr dünya təcrübəsində autizmli gənclərin sosiallaşması və məşğulluğu sahəsində tətbiq olunan modellər haqqında fikirlərini bölüşüblər. Eyni zamanda, Azərbaycanda reallaşdırılmasını istədikləri təşəbbüslər, o cümlədən dəstəkli məşğulluq proqramlarının genişləndirilməsi, sosial müəssisələrin artırılması və peşə yönümlü təlimlərin tətbiqi ilə bağlı təkliflər səsləndirilib.
Müzakirələr interaktiv formatda keçirilib, tələbələrin sualları cavablandırılıb və praktiki nümunələr əsasında fikir mübadiləsi aparılıb. Seminar Korreksiyaedici təlim ixtisası üzrə təhsil alan tələbələrin gələcək peşə fəaliyyətində autizmli gənclərlə işləmək baxımından bilik və dünyagörüşünün artırılmasına töhfə verib.