19 dekabr 2025-ci il tarixində Bakıda “Bəhai İcması Azərbaycan mədəniyyəti və multikulturalizmi kontekstində” mövzusunda əhatəli konfrans təşkil olunub. Tədbir Azərbaycanın multikultural dəyərlərinin, dini tolerantlığının və bəşəri ideyaların təbliğinə həsr edilib.
“Tehsil365” xəbər verir ki, konfransda ölkənin tanınmış dövlət, elm və din xadimləri, ictimai təşkilatların nümayəndələri, eləcə də xarici qonaqlar iştirak ediblər. Tədbirin əsas məqsədi Bəhai İcmasının dəyərlərinin Azərbaycan cəmiyyətində formalaşmış tolerantlıq və multikulturalizm mühiti ilə uzlaşmasını nümayiş etdirmək olub.
Konfransda Bakı Beynəlxalq Multikulturalizm Mərkəzinin İcraçı direktoru Rəvan Həsənov, Dini Qurumlarla İş üzrə Dövlət Komitəsinin nümayəndəsi Aslan Sultanov, “Simurq” Azərbaycan Mədəniyyət Assosiasiyasının prezidenti professor Fuad Məmmədov və vitse-prezidenti, Mədəniyyət Səfiri professor Səlahəddin Əyyubov, Azərbaycan Bəhailəri Milli Ruhani Məhfilinin katibi Ramazan Əsgərli, Bəhai İcmasının İctimai Əlaqələr Ofisinin koordinatoru Mirhüseyn Seyidov, professor Əzizə Cəfərzadənin oğlu və davamçısı Turan İbrahimov, “200 illik gizli tarix” filminin rejissoru Kəmalə Musazadə və avstraliyalı bəhai musiqiçisi Con Varney çıxış ediblər.
Professor Səlahəddin Əyyubov öz məruzəsində Bəhai dininin tarixi, əsas dəyərləri və Azərbaycandakı fəaliyyəti barədə ətraflı məlumat verib. Təqdimat zamanı Bəhai İcmasının dünya miqyasında həyata keçirdiyi humanist və maarifləndirici fəaliyyətləri əks etdirən slaydlar nümayiş olunub.
Turan İbrahimov çıxışında anası, görkəmli yazıçı və alim professor Əzizə Cəfərzadənin yaradıcılığından bəhs edib. Bildirib ki, yazıçının 1996-cı ildə nəşr olunan “İşığa doğru” və 1998-ci ildə işıq üzü görən “Tahirə Qüdrətli” romanları Tahirə Qüdrətlinin həyatına həsr olunub. Qeyd edilib ki, Tahirə Qüdrətli Qurana təsvir yazmış ilk və yeganə qadın olub, Azərbaycan, fars və ərəb dillərində şeirlər qələmə alıb.
Rejissor Kəmalə Musazadə tərəfindən təqdim olunan filmdə tarixdə ilk dəfə olaraq Bəhai icmasının yaranması, inkişafı və Azərbaycandakı fəaliyyəti geniş şəkildə əks etdirilib. Film bu ilin may ayında Nizami Kino Mərkəzində nümayiş etdirilib.
Çıxışlarda tolerantlığın, qarşılıqlı hörmətin və dini dözümlülüyün cəmiyyətin əsas sütunlarından biri olduğu vurğulanıb. Qeyd edilib ki, müxtəlif mədəniyyət və inanclara sahib insanların sülh və harmoniyada birgə yaşaması Azərbaycan multikulturalizm modelinin uğurlu nümunəsidir. Tədbirdə səsləndirilən “Biz müxtəlif olsaq da, bizi ümumi nöqtədə birləşdirən şey insan olmağımızdır” fikri konfransın əsas ideyasını ifadə edib.
Konfransın sonunda tanınmış xanəndə Nəsrin Şəfiyinin ifa etdiyi muğam proqramı tədbirə xüsusi bədii və mənəvi dəyər qataraq iştirakçılarda dərin təəssürat yaradıb.
Tədbir bir daha sübut edib ki, Azərbaycanda dinindən və mənsubiyyətindən asılı olmayaraq bütün icmalara hörmətlə yanaşılır və onlar cəmiyyətin inteqrasiyasında fəal rol oynayırlar.
