Azərbaycanın bir sıra ali məktəbləri 31 Dekabr - Dünya Azərbaycanlılarının Həmrəyliyi Günü və Yenil il bayramı münasibətilə əməkdaşlarına pul mükafatı verəcək.
“Tehsil365” xəbər verir ki, bu barədə “Yeni Sabah”ın apardığı araşdırma zamanı məlum olub.
Bakı Dövlət Universitetindən (BDU) bildirilib ki, ali məktəb rəhbərliyi üçün əməkdaşlarının sosial rifahının yaxşılaşdırılması həmişə diqqət mərkəzindədir və əlamətdar günlərdə mütəmadi mükafatlar olur: “Bu, növbəti bayramlar üçün də nəzərdə tutulub. Ancaq mükafatın məbləği hələ dəqiqləşməyib. Bununla bağlı qərar gələn həftə Elmi Şuranın iclasında qəbul olunacaq”.
Azərbaycan Dövlət İqtisad Universitetindən (UNEC) qeyd olunub ki, bayram münasibətilə bütün əməkdaşlara 500 manat məbləğində mükafat ayrılıb. Bununla bağlı ali təhsil müəssisəsinin rektoru Ədalət Muradov əmr imzalayıb.
Memarlıq və İnşaat Universiteti də bayramlar münasibətilə əməkdaşlarını sevindirəcək. Ali məktəbin rektoru, memarlıq doktoru, professor Gülçöhrə Məmmədova hələ dekabrın 11-də bununla bağlı əmr imzalayıb. Əmrə əsasən, Azərbaycan Memarlıq və İnşaat Universitetinin 50 illik yubileyi və bayramlar münasibətilə bütün əməkdaşlara bir aylıq əməkhaqqı məbləğində mükafat verilib.
Bakı Mühəndislik Universitetindən isə saytımızın sorğusuna cavab olaraq deyilib ki, BMU-da hər il Yeni il, Novruz və Qurban bayramlarında birdəfəlik pul mükafatları ödənilir. Bu ildə Yeni il ərəfəsində pul mükafatının verilməsi nəzərdə tutulur.
Azərbaycan Dövlət Neft və Sənaye Universitetinin bütün əməkdaşlarına 1000 manat məbləğində mükafat veriləcək.
Mingəçevir Dövlət Universitetində də bayramlar münasibətilə pul mükafatı olacaq. Amma məbləğ açıqlanmayıb.
Azərbaycan Tibb Universitetindən bildirilib ki, bayramlarla əlaqədar əməkdaşlara pul mükafatının verilməsi nəzərdə tutulmayıb.
ADA Universitetindən isə sorğumuza cavab olaraq qeyd olunub ki, ali təhsil müəssisəsi bu haqda məlumatları ictimaiyyətlə paylaşmır.
Azərbaycan Dövlət Pedaqoji Universitetində mükafatla bağlı son qərar verilməyib. Bildirilib ki, əgər belə bir məsələ olsa, ictimaiyyətə açıqlanacaq.
Mədəniyyət və İncəsənət Universitetinin sözçüsü sualı cavablandırmaqdan imtina edib: “Belə sorğularda iştirak etmirik”.