Müəllimlərin peşəkarlığının artırılmasının ən effektiv yolu metodbirləşmə rəhbərləri və metodistlərin bu prosesə fəal şəkildə qoşulmasıdır.
Bu fikri “Tehsil365”ə ixtisas seçimi və gələcək karyera üzrə mütəxəssis, təhsil üzrə ekspert Ramin Nurəliyev bildirib. Onun sözlərinə görə, Elm və Təhsil Nazirliyinin regional təhsil idarələrində, eləcə də Bakı Şəhəri üzrə Təhsil İdarəsində çalışan metodistlər hər ixtisas üzrə fənn müəllimləri ilə mütəmadi işləməlidir. Metodistlər öz ixtisasını dərindən bilən, beynəlxalq təcrübəni araşdıran və bu təcrübəni yerli tədris sisteminə tətbiq edə bilən peşəkarlar olmalıdır. Lakin hazırda metodistlərin fəaliyyətində passivlik hiss olunur.
Ekspert qeyd edib ki, müəllimlərin peşəkar inkişafına məhz metodistlərdən başlamaq lazımdır. Metodistlər fənn müəllimləri ilə mütəmadi görüşlər keçirməli, yenilikləri onlara çatdırmalı, seminar və təlimlər təşkil etməlidirlər.
Türkiyə modelini nümunə göstərən R.Nurəliyev bildirib ki, bu ölkədə fənn üzrə seçilmiş müəllimlər vasitəsilə məktəblərdə bilik və bacarıqlar sistemli şəkildə ötürülür.
Müsahibimiz vurğulayıb ki, metodistlər həftədə ən azı bir dəfə ümumtəhsil məktəblərində dərsləri dinləməli və yeni tədris metodlarını izah etməlidirlər. Xüsusilə ali məktəbi yeni bitirmiş gənc müəllimlərin metodik dəstəyə ehtiyacı böyükdür. Bu baxımdan fənlər üzrə müsabiqələrin, açıq dərslərin təşkili də müəllimlərin inkişafına müsbət təsir göstərə bilər.
Ekspert əlavə edib ki, müasir dövrdə elektron resurslardan, süni intellekt və internet imkanlarından daha geniş istifadə olunmalıdır. Ənənəvi əyani vəsaitlər əvəzinə elektron materiallar, videodərslər və interaktiv təqdimatlar hazırlanmalı, bu materiallar müəllimlərin istifadəsinə verilməlidir. Bu proses üçün əlavə maddi-texniki baza tələb olunmur, əsas məsələ metodistlərin təşəbbüskarlığı və məsuliyyətidir.
R.Nurəliyevin fikrincə, metodistlərin aktiv fəaliyyəti qısa zamanda müəllimlərin tədris keyfiyyətində və şagird nailiyyətlərində özünü göstərə bilər.