Bu gün Bakı Dövlət Universitetində Qərbi Azərbaycan İcması ilə birgə “Böyük yolun davamı” adlı tədbirin keçirilməsində əsas məqsəd bu yolun davamının necə olacağını bir daha nəzərdən keçirməkdir. Həmçinin birgə görəcəyimiz işləri təhlil etmək və bu yolun davamçıları olacaq gənc nəslin təlim-tərbiyəsi istiqamətində qarşımızda duran vəzifələr barədə fikir mübadiləsi aparmaqdır.
“Tehsil365” xəbər verir ki, bu sözləri jurnalistlərə müsahibəsində Bakı Dövlət Universitetinin (BDU) rektoru Elçin Babayev söyləyib. O bildirib ki, Bakı Dövlət Universitetində Qərbi Azərbaycan Araşdırmaları Mərkəzi yaradılıb. Bu mərkəz qarşısına Qərbi Azərbaycanla bağlı elmi tədqiqatların aparılması, müxtəlif təlimlərin keçirilməsi, mədəni irsin — həm maddi, həm də qeyri-maddi irsin araşdırılması və əldə olunan nəticələrin toplular, kitablar, zərurət olduqda isə dərslik və dərs vəsaitləri şəklində nəşr edilməsi kimi mühüm məqsədlər qoyub. Əlbəttə, bunlar bir günün işi deyil. Bu proses davamlı xarakter daşıyacaq və bu istiqamətdə hamımızın birgə fəaliyyəti son dərəcə vacibdir.
“Yeni nəsil, formalaşan gənclik tariximizi və keçmişimizi dərindən bilməli, bu günlə ayaqlaşmalı, gələcəyə isə daha böyük ümidlərlə baxmalıdır.
Prezident İlham Əliyev də öz çıxışlarında dəfələrlə vurğulayıb ki, Azərbaycan tolerant və sülhsevər ölkə olmaqla yanaşı, bütün proseslərin hüquqi çərçivədə həllinin tərəfdarıdır. Biz əminik ki, bu böyük yol ardıcıl şəkildə davam edəcək və güclənən, qüdrətlənən Azərbaycan qarşısına qoyduğu məqsədlərə mütləq nail olacaq”,- deyə rektor Elçin Babayev vurğulayıb.