Azərbaycan Dillər Universiteti (ADU) Konfutsi İnstitutunun Çin tərəfdən direktoru Li Jihua və Konfutsi İnstitutunun Çin dili müəllimləri Çjao Cinruy, Fan Cihao, Li Şa və Lin Tin Dövlət Miqrasiya Xidməti tərəfindən təşkil edilən "Miqrasiya, Suverenlik və Konstitusiya Hüquqları" adlı konfransında iştirak ediblər.
ADU-dan “Tehsil365”ə bildirilib ki, "Konstitusiya və Suverenlik İli"nə həsr olunmuş konfransda Dövlət Miqrasiya Xidmətinin rəisi Vüsal Hüseynov, Beynəlxalq Miqrasiya Təşkilatının nümayəndələri və Azərbaycan Milli Məclisinin deputataları çıxış ediblər.
Tədbirdə, həmçinin Azərbaycanda yaşayan miqrant Nik Nvolisanın Qarabağ və Azərbaycanın suverenliyinin bərpası ilə bağlı təəssüratlarını bölüşdüyü və qələmə aldığı kitabının təqdimatı olub.
Konfutsi İnstitutunda “Konstitusiya və Suverenlik İli”nə həsr olunmuş tələbələr üçün seminar da təşkil olunub. Seminarda vurğulanıb ki, Azərbaycan Konstitusiyası suverenliyimizin və ərazi bütövlüyümüzün qorunması, qanunun aliliyinin və dünyəviliyin möhkəmləndirilməsi, vətəndaşlar üçün layiqli həyat şəraitinin təmin edilməsi, dostluq və tərəfdaşlıq xarakterli beynəlxalq münasibətlərin inkişaf etdirilməsi üçün möhkəm hüquqi baza yaradır. Konfutsi İnstitutunun direktoru Rafiq Abbasov Çin Xalq Respublikasının Konstitusiyasının əsas müddəalarını da qeyd edərək, əsas qanunun islahatlara, sosialist modernləşməyə, insan hüquqlarının qorunmasına, milli birliyin, həmrəyliyin, harmoniyanın və sabitliyin qorunmasına zəmanət verdiyini vurğulayıb.