Bakı Mühəndislik Universitetinin (BMU) rektoru Yaqub Piriyevin rəhbərlik etdiyi nümayəndə heyəti Azərbaycan Respublikasının Müdafiə Sənayesi Nazirliyində olub. Müdafiə sənayesi nazirinin müavini Hidayət Əzimovla keçirilən görüşdə BMU-nun tədris və tədqiqat imkanları, Texnoparkı, müdafiə sənayesi istiqaməti üzrə nəzərdə tutulan işlər barədə geniş informasiyalar verilib.
Bu barədə “Tehsil365”ə BMU-dan məlumat verilib.
Görüşdə Müdafiə Sənayesi Nazirliyinin 2025-2030-cu illər üçün müəyyənləşdirdiyi insan kapitalının inkişafı üzrə fəaliyyət istiqamətləri barədə ətraflı məlumatlar diqqətə çatdırılıb. Eyni zamanda, güclü müdafiə sənayesi ekosisteminin formalaşdırılması məqsədilə universitet-sənaye-dövlət əməkdaşlığı əsasında 2026-cı ildə icrası planlaşdırılan yeni layihələr müzakirə edilib. Bununla yanaşı, 2025-ci ildə uğurla həyata keçirilən “DefAge Bootcamp” layihəsinin nəticələri təqdim olunub.
Müzakirələr zamanı ölkəmizdə müdafiə sənayesinin uzunmüddətli və dayanıqlı inkişafının təmin olunması məqsədilə tədqiqat və inkişafa əsaslanan, elm tutumlu ekosistemin formalaşdırılmasının əhəmiyyəti xüsusi qeyd edilib.
Sadalanan istiqamətlər üzrə birgə fəaliyyətin gücləndirilməsinə və prosesin davamlılığının təmin edilməsinə dair fikir mübadiləsi aparılıb, həmçinin belə görüşlərin mütəmadi keçirilməsi razılaşdırılıb.
BMU rektoru Müdafiə Sənayesi Nazirliyi işçilərinin peşə bayramı və nazirliyin yaradılmasının 20 illik yubileyi ilə əlaqədar keçirilən tədbirlərdə də iştirak edib.
