Bu gün Azərbaycanın görkəmli jurnalisti, tanınmış ictimai xadimi, professor Nəsir İmanquliyevin anadan olmasının 114-cü ildönümü tamam olur.
“Tehsil365” xəbər verir ki, peşəkar redaktor, publisist və pedaqoq kimi tanınan Nəsir İmanquliyev ömrünü Azərbaycan mətbuatının və milli mədəniyyətin inkişafına, peşəkar jurnalist kadrların hazırlanmasına həsr edib.
Nəsir İmanquliyev 22 dekabr 1911-ci ildə Bakı şəhərində anadan olub. 1925–1926-cı illərdə Bakıda peşə məktəbini bitirib, 1934-cü ildə Lassal adına Neft Texnikumuna daxil olub. Dövri mətbuatda ilk yazıları tələbəlik illərində çap olunmağa başlayıb. O, “Kommunist”, “Yeni yol”, “Gənc işçi”, “Vətənin səsi” qəzetlərində ədəbi işçi, şöbə müdirinin müavini, şöbə müdiri, məsul katib və redaktor vəzifələrində çalışıb.
İkinci Dünya müharibəsi illərində, 1942-ci ildə siyasi işçi kimi Krım cəbhəsinə göndərilən Nəsir İmanquliyev “Vuruşan Krım” qəzetinin məsul katibi olub, eyni zamanda hərbi hissədə tərcüməçi kimi fəaliyyət göstərib. Bir il sonra “Kommunist” qəzetinə məsul katib təyin edilib və bu dövrdə vətənpərvərlik mövzusunda bir sıra məqalələri dərc olunub.
1947-ci ildən Bakı Dövlət Universitetində pedaqoji fəaliyyətə başlayan Nəsir İmanquliyev 1948–1950-ci illərdə BDU-nun Filologiya fakültəsində təhsilini müvəffəqiyyətlə başa vurub. 1947–1998-ci illərdə BDU-nun Jurnalistika fakültəsinin Jurnalistikanın nəzəriyyəsi və təcrübəsi kafedrasında müəllim, dosent və professor kimi çalışıb, gənc jurnalist kadrların hazırlanmasında əvəzsiz xidmətlər göstərib. O, 1953-cü ildə əsası qoyulan “Bakı” və “Баку” axşam qəzetlərinin 1958-ci ildən baş redaktoru olub.
Professor Nəsir İmanquliyev müxtəlif illərdə Azərbaycan Mədəniyyət Nazirliyinin Radiolaşdırma Baş İdarəsinin rəisi, Azərbaycan SSR Nazirlər Soveti yanında Radio və Televiziya Verilişləri Komitəsi sədrinin birinci müavini vəzifələrində də çalışıb. O, 1976-cı ildə “Azərbaycan SSR Əməkdar mədəniyyət işçisi”, 1990-cı ildə isə “Əməkdar jurnalist” fəxri adlarına layiq görülüb.
Nəsir İmanquliyev 1998-ci il martın 7-də Bakı şəhərində vəfat edib. 2011-ci ilin dekabrında Azərbaycan Respublikası Prezidentinin Sərəncamına əsasən, görkəmli alim-publisistin anadan olmasının 100 illiyi münasibətilə silsilə yubiley tədbirləri keçirilib.
Azərbaycan milli mətbuatının inkişafında mühüm rol oynayan Nəsir İmanquliyev milli ənənələrə söykənən orijinal jurnalistlik məktəbi yaradıb. Ömrünün 50 ildən çoxunu BDU-nun Jurnalistika fakültəsində milli kadrların hazırlanmasına həsr edən alim-publisist zəngin pedaqoji fəaliyyəti ilə jurnalistlərin böyük bir nəslinin formalaşmasına töhfə verib.
Görkəmli jurnalistin işıqlı xatirəsi onu sevənlərin, həmkarlarının və tələbələrinin qəlbində daim yaşayacaq.