Yeni il ərəfəsində “BeKind” cəmiyyəti fərqli inkişaf xüsusiyyətləri olan uşaqlar və onların valideynləri üçün bayram tədbiri təşkil edib.
‘‘Tehsil365’’ bildirir ki, cəmiyyətin təsisçisi Şirin Rzayeva tədbirin necə keçdiyindən və bu cür təşəbbüslərin fərqli inkişaf xüsusiyyətinə malik uşaqlar böyüdən ailələr üçün nə dərəcədə vacib olmasından danışıb.
“Uşaqlar ən böyük arzularını əks etdirən məktublarını yazdılar və biz həmin məktubları sosial şəbəkə hesablarımızda paylaşdıq. Bu səmimi və kövrək çağırışa laqeyd qalmayan çoxlu sayda insanlar cavab verdilər, bir sözlə, məktublar paylaşıldı və hər bir uşaq üçün öz sehrbazı tapıldı. Arzular gerçəkləşməyə başladı”, – deyə həmsöhbətimiz vurğulayıb.
Ş.Rzayevanın sözlərinə görə, ümumi dəstək və xeyirxah insanların sayəsində əsl Yeni il bayramı təşkil etmək mümkün olub.
“Həmişə olduğu kimi Azərbaycan Respublikasının Əməkdar artisti, Rus Dram Teatrının aktrisası İnna İmranova yanımızda idi. Teatrın istedadlı gənc aktyorları Şaxta baba və Qar qızı canlandıraraq sehrli ab-hava yaradıblar.
Uşaqlar çoxdan gözlədikləri hədiyyələr alıblar, rəqs edib, gülüb və əyləniblər, ən əsası isə diqqət, qayğı və bayram sevincini hiss ediblər. Bu duyğular əvəzsizdir. Bu uşaqların anaları da hədiyyəsiz qalmayıb, belə ki, “Safetrade” şirkəti onlar üçün qulluq vasitələri göndərib. Həmçinin “Starbucks”dan olan dostlarımız tədbirdə iştirak edərək hamını ləzzətli qəhvəyə qonaq ediblər”, – deyə Ş.Rzayeva bildirib.
Onun sözlərinə görə, bu cür tədbirlər təkcə uşaqlar üçün deyil, onların anaları üçün də böyük əhəmiyyət daşıyır: “Xüsusi uşaqlar böyüdən ailələr üçün belə görüşlər dəstək, cəmiyyətdə qəbul olunma hissi və tək olmadıqlarını xatırladan mühüm məqamlardır. Bu, güc, inam və ümid verən anlardır. Bu möcüzənin bir parçasına çevrilən və uşaqlara əsl bayram bəxş edən hər kəsə təşəkkür edirəm!”.