22 dekabr 2025-ci il tarixində Bakıda “Media savadlılığı” mövzusunda konfrans təşkil olunub. Konfransın moderatoru teleaparıcı Ürfan Məmmədli olub.
“Tehsil365” xəbər verir ki, Tədbirdə dövlət qurumlarının nümayəndələri, media və kommunikasiya sahəsinin mütəxəssisləri, eləcə də gənclərlə işləyən ekspertlər çıxış ediblər.
Konfransda Elm və Təhsil Nazirliyinin İctimaiyyətlə əlaqələr və kommunikasiya şöbəsinin müdiri Səbuhi Rzayev, Gənclər və İdman Nazirliyinin Gənclərlə iş şöbəsinin müdir müavini Ülviyyə Axundova, “Azerconnect Group”un Korporativ Kommunikasiyalar departamentinin direktoru Əziz Axundov, influencer və “Nextool AI” şirkətinin təsisçisi Cəfər Nəcəfov, həmçinin Azərbaycan Respublikasının Medianın İnkişafı Agentliyinin departament direktoru Ləman İsgəndərova və agentliyin icraçı direktoru Əhməd İsmayılov çıxış ediblər.
Tədbir çərçivəsində media savadlılığının təhsil sisteminə inteqrasiyasının uzunmüddətli və davamlı proses olduğu vurğulanıb. Bildirilib ki, ümumtəhsil məktəblərində media savadlılığı ilə bağlı layihə həyata keçirilib. Layihə çərçivəsində 12 məktəbdə 20 müəllim media savadlılığının tədrisi üzrə hazırlıq keçib. Oktyabr ayında keçirilən müəllim təlimlərindən sonra noyabr və dekabr aylarında 7–11-ci sinif şagirdləri olmaqla ümumilikdə 2000 nəfər bu proqramlara cəlb olunub.
Elm və Təhsil Nazirliyinin nümayəndəsi Səbuhi Rzayev çıxışında bildirib ki, əvvəlki illərdə məktəblərdə sürətli oxu yarışları keçirilirdisə, bu gün texnologiya dövründə daha çox düşünmə və analiz bacarıqları ön plana çıxır. Onun sözlərinə görə, ümumtəhsil məktəblərinin şagirdləri arasında keçirilən “Bilik bacarığı” müsabiqələrində əsas diqqət verilən tapşırıqlar vasitəsilə şagirdlərin bilik və bacarıqlarının artırılmasıdır. Səbuhi Rzayev qeyd edib ki, media savadlılığı informasiyanın düzgünlüyünü anlamaq üçün ilk növbədə bilmək və anlama bacarıqlarının inkişafını tələb edir və bu istiqamətdə mövcud dərsliklərdə kifayət qədər imkanlar mövcuddur.
Gənclər və İdman Nazirliyinin nümayəndəsi Ülviyyə Axundova çıxışında vurğulayıb ki, qadağalar cəmiyyətdə qısa müddətli nəzarət yaratsa da, media savadlılığının formalaşması üçün bu yanaşma bacarıqlara çevrilməlidir. Onun sözlərinə görə, gənclər yanlış və düzgün informasiyanı ayırd etməyi, məlumatın mənbəyini araşdırmağı və etibarlı mənbələrə əsaslanmağı öyrənməlidirlər. Layihələr zamanı müşahidə olunur ki, müasir gənclər informasiyanı daha tez əldə edir və sürətli şəkildə təhlil etmə bacarığına malikdirlər.
“Azerconnect Group”un Korporativ Kommunikasiyalar departamentinin direktoru Əziz Axundov mediada yanlış məlumatların yayılmasının yeni qurbanların ortaya çıxmasına səbəb olduğunu bildirib. O qeyd edib ki, dezinformasiyaya qarşı mübarizədə tədqiqat və analiz əsas rol oynayır. Əziz Axundovun fikrincə, gündəlik həyatda böyük qərarlar verməzdən əvvəl aparılan araşdırma kimi, məlumatların doğruluğu da eyni yanaşma ilə yoxlanılmalıdır.
Influencer və “Nextool AI” şirkətinin təsisçisi Cəfər Nəcəfov isə çıxışında məsuliyyətli yanaşma və dərin analiz aparmağın informasiyanın düzgünlüyünü müəyyənləşdirməyin əsas şərti olduğunu vurğulayıb.
Konfrans çərçivəsində öyrədici sessiyalar davam etdirilib və media savadlılığının cəmiyyətin bütün təbəqələri, xüsusilə də gənclər üçün əhəmiyyəti bir daha diqqətə çatdırılıb.
