Bakı Dövlət Universitetinin (BDU) təşkilatçılığı, Türkiyənin Konya Texniki Universiteti, Qazaxıstanın Əl-Fərabi adına Qazax Milli Universiteti, Satbayev adına Qazax Milli Tədqiqat Texniki Universiteti, Özbəkistanın Geologiya Elmləri Universiteti, Rumıniyanın Kənd Təsərrüfatı Elmləri və Baytarlıq Təbabəti Banats Universitetinin elmi tərəfdaşlığı ilə “Dayanıqlı gələcək: Yer elmləri və ekologiyanın inteqrasiyalı inkişafı” mövzusunda I beynəlxalq elmi konfrans öz işinə başlayıb.
Bu barədə “Tehsil365”ə BDU-dan məlumat verilib.
Konfransın açılış mərasimində BDU-nun elm və innovasiya üzrə prorektoru Hüseyn Məmmədov bildirib ki, hazırda Azərbaycan qlobal enerji təhlükəsizliyinin təmin edilməsi və “yaşıl iqtisadiyyat”a keçid üçün strateji mexanizmlərin işlənib hazırlanması məsələlərində fəal mövqe tutur. Prezident İlham Əliyevin müvafiq Fərmanı ilə təsdiq olunmuş “Azərbaycan 2030: sosial-iqtisadi inkişafa dair Milli Prioritetlər”də “dayanıqlı artan rəqabətqabiliyyətli iqtisadiyyat” və “təmiz ətraf mühit və “yaşıl artım” ölkəsi” beş əsas prioritetdəndir. Prorektor diqqətə çatdırıb ki, son illər BDU-da ətraf mühitin mühafizəsi, iqlim dəyişmələri ilə mübarizə istiqamətində elmi-tədqiqiat işləri, ekoloji maarifləndirmə və ekoloji məsuliyyətin artırılması üçün layihələr həyata keçirilir. BDU Birləşmiş Millətlər Təşkilatı Baş Assambleyası tərəfindən qəbul edilmiş 17 Dayanıqlı İnkişaf Məqsədi (DİM) və bu məqsədlərlə əlaqəli 169 hədəf istiqamətində öz fəaliyyətini genişləndirir.
Azərbaycan Respublikasının Baş Prokurorluğu ilə birgə BDU-nun nəzdində ECOLEAD Klinikası, ekoloji maarifləndirmə və tədqiqat mərkəzi, tələbə və tədqiqatçıların ətraf mühitin qorunması sahəsində daha geniş məlumat və təcrübə qazanmalarını təmin edən “Ekoməkan”, Tələbə Elmi-Texniki Yaradıcılıq Mərkəzi tərəfindən hazırlanmış Ekoenerji Məntəqəsi fəaliyyət göstərir. BDU dünya universitetləri ilə əməkdaşlıq edərək bakalavr, magistratura və doktorantura səviyyələrində 15-dən çox ikili diplom proqramı həyata keçirir. BDU-nun sənaye müəssisələri ilə əlaqələrinin inkişafı nəticəsində son 5 ildə 120-dən çox milli və beynəlxalq qrant və müqavilə əsasında layihə həyata keçirilib, 700-dən çox tələbə, doktorant, gənc tədqiqatçı layihələrdə təmsil olunub.
“BDU Yer elmləri sahəsində yeni məktəblərin yaranmasında, beynəlxalq əlaqələrin və elmi tədqiqatların genişlənməsində maraqlıdır. İlk dəfə keçirilən bu konfransda Azərbaycan, Türkiyə, Almaniya, Pakistan, Rumıniya, Qazaxıstan, Özbəkistan, Qırğızıstan, Mali, Çin, İsrail, Lüksemburq da daxil olmaqla 12 ölkə təmsil olunur. Konfransın proqramına 280 məruzə daxil edilib. İnanırıq ki, konfrans Yer elmləri sahəsində alimlər və gənc tədqiqatçılar üçün mühüm platforma olacaq, yeni elmi prioritetlər müəyyən edəcək”, - deyə prorektor bildirib.
Bakı Ali Neft Məktəbinin (BANM) rektoru Elmar Qasımov isə konfransın regionun strateji və dayanıqlı inkişafına, ekologiyanın qorunmasına xidmət etdiyini bildirib. Hazırda ölkəmizin ekosistemi üçün ən vacib məsələlərdən birinin Xəzər dənizi ilə əlaqədar olduğunu deyən BANM rektoru konfansda ekologiya, geologiya, coğrafiya istiqamətləri üzrə ən aktual məsələlərə toxunulacağına əminliyini bildirib.
BDU-nun Faydalı qazıntılar kafedrasının müdiri akademik Vasif Babazadə, Coğrafi ekologiya kafedrasının professoru Şövqisəfa Göyçayski, Elm və Təhsil Nazirliyinin Coğrafiya İnstitutunun baş direktoru vəzifəsini icra edən dosent Zaur İmrani, Neft və Qaz İnstitutunun icraçı direktoru professor Vaqif Qurbanov, Respublika Uşaq-Gənclər İnkişafı Mərkəzinin direktoru, BDU-nun Bioekologiya kafedrasının dosenti Firuzə Sultan-zadə, Türkiyənin Konya Texniki Universitetinin professorları Ekrem Tusat, Muzaffer Kahveci, Qazaxıstanın Əl-Fərabi adına Qazax Milli Universitetinin UNESCO-nun dayanıqlı inkişaf üzrə kafedrasının müdiri, dosent Tursynkul Bazarbayeva, Qazaxıstanın Satbayev adına Qazax Milli Tədqiqat Texniki Universitetinin professoru Göhfər Bişimbayeva çıxışlarında qlobal iqlim dəyişikliklərinin davamlı inkişafa təsiri, qarşıda dayanan əsas çağırışlara dair fikirlərini bildiriblər.
Konfrans öz işini plenar sessiyalarla davam etdirir.
