Yardımlı rayon Şıxlar kənd M.T.Zamanov adına tam orta məktəbin 10-cu sinfinin bağlanması valideynlərin narazılığına səbəb olub.
Valideynlər “Tehsil365” xəbər portalına müraciət edərək bildiriblər ki, 15.09.2025-ci il tarixində sistemdə sinifin 4 şagird göründüyü üçün sinif bağlanıb. Halbuki həmin il sinifdə faktiki olaraq 5 nəfər şagird olub, lakin yeni qəbul olunan şagird sistemdə gecikmiş qeydiyyat səbəbindən görünməyib.
Valideynlər qeyd edirlər ki, uşaqlarını uzaqda yerləşən qonşu Azər Məmmədov adına Çanaqbulaq kənd tam orta məktəbinə göndərməyə məcbur olublar. Kənd yollarının yararsız və təhlükəli olduğunu, hava şəraitinin sərt keçdiyini, nəqliyyatın isə mövcud olmadığını bildirən valideynlər uşaqların təhlükəli şəraitdə məktəbə gedib-gəldiyini vurğulayırlar.
Valideynlər həmçinin dəfələrlə Təhsil Nazirliyinə və Regional Təhsil İdarəsinə müraciət etmələrinə baxmayaraq, sinfin bərpa olunmadığını deyirlər.
Mövzu ilə bağlı Lənkəran-Astara Regional Təhsil İdarəsindən “Tehsil365”ə bildirilib ki, Yardımlı rayonu Şıxlar kənd M.T.Zamanov adına tam orta məktəbin 10-cu sinfinin açılmaması mövcud qanunvericiliyin tələblərinə uyğundur. Açıqlamada qeyd olunub ki, Azərbaycan Respublikasının “Təhsil haqqında” və “Ümumi təhsil haqqında” qanunlarına əsasən yalnız ibtidai və ümumi orta təhsil səviyyələrində məktəblərin azkomplektli formada fəaliyyətinə icazə verilir.
İdarə əlavə edib ki, Nazirlər Kabinetinin təsdiq etdiyi “Dövlət ümumi təhsil müəssisəsində siniflər üzrə şagird sıxlığı normaları”na görə, tam orta siniflərin təşkili üçün minimum şagird sayı təmin edilməlidir. Şıxlar kənd məktəbində 10-cu sinifdə cəmi 4 şagird olduğundan sinfin açılması normativ tələblərə cavab vermir.
Valideynlərlə görüş keçirildiyi və müraciətlərin rəsmi qaydada izah olunduğu bildirilib. Şagirdlərin təhsil hüququnun təmin olunması məqsədilə onların qonşu məktəblərdə təhsillərini davam etdirmələri tövsiyə olunub. Qeyd edilib ki, 2025–2026-cı tədris ili üzrə 14 oktyabr saat 11:00-dan etibarən şagird yerdəyişməsi prosesi davam edir.