Azərbaycan Dillər Universitetində (ADU) ilk Çin mahnı müsabiqəsi keçirilib. Müsabiqə “Dostluq mahnıdan başlayır” devizi altında Azərbaycan Çin Assosiasiyası və ADU-nun Konfutsi İnstitutu tərəfindən təşkil edilib.
Universitetdən “Tehsil365"ə bildirilib ki, təkcə musiqi bayramı deyil, həm də Çin-Azərbaycan mədəni mübadiləsinin gücləndirilməsi üçün platforma rolunu oynayan müsabiqəyə Azərbaycanda təhsil alan çinli tələbələr və ADU Konfutsi İnstitutunun tələbələri də daxil olmaqla, 40-dan çox iştirakçı qatılıb.
Çinin Azərbaycandakı səfiri xanım Lu Mey çıxışında musiqinin sərhədləri aşan universal bir dil olduğunu və insanların qəlblərini birləşdirən görünməz bir bağ olduğunu vurğulayıb. O, müsabiqə iştirakçılarını “mahnı vasitəsilə dostlaşmağa” və yalnız şəxsi istedadlarını səhnədə nümayiş etdirməklə kifayətlənməyib, həm də Çin-Azərbaycan dostluğunun “oxuyan səfirləri” olmağa, mahnı vasitəsilə iki qardaş xalqa istilik və xoşməramlılıq ötürməyə təşviq edib.
O, həmçinin bugünkü tədbirin iki ölkə arasında mədəni mübadiləyə yeni nəfəs verdiyini qeyd edib və müsabiqənin gələcəkdə yenidən keçiriləcəyinə, Azərbaycanın mədəni brendinə çevriləcəyinə və Çin-Azərbaycan dostluğunu daha da gücləndirəcəyinə ümidvar olduğunu bildirib.
ADU-nun tədris işləri üzrə prorektoru Şəfəq Şahməmmədova çıxışında Konfutsi İnstitutunun Çin və Azərbaycan arasında mədəni və təhsil mübadiləsinin asanlaşdırılmasındakı əsas rolunu yüksək qiymətləndirib. O, Konfutsi İnstitutunun təkcə Çin dilinin tədrisi üçün platforma deyil, həm də Çin mədəniyyətinin yayılması və iki ölkə arasında qarşılıqlı anlaşmanın möhkəmləndirilməsi üçün mühüm körpü olduğunu qeyd edib. Bildirib ki, Çin mahnı müsabiqəsinin uğurla keçirilməsi Azərbaycan gənclərinin Çin mədəniyyətinə olan böyük marağını tam şəkildə nümayiş etdirir. O qeyd edib ki, ADU Konfutsi İnstitutunun direktorları Rafiq Abbasov və Li Cihuanın rəhbərliyi ilə Çin-Azərbaycan mədəni əlaqələrinin inkişafına töhfələrin verilməsi davam edəcək.
Azərbaycan Çin Assosiasiyasının prezidenti Bao Lijun çıxışında mahnıların Çin xalqının mədəni irsində xüsusi yer tutduğunu qeyd edərək bildirir ki, mahnı oxumaqla iştirakçılar Çin mədəniyyətinin özünəməxsus cazibəsini qiymətləndirməklə yanaşı, həm də iki qardaş xalq arasında artan dostluğu nümayiş etdirəcəklər.
Müsabiqədə iştirakçılar ənənəvi Çin xalq mahnıları və müasir pop əsərləri də daxil olmaqla müxtəlif mahnı janrlarını ifa ediblər. Münsiflər heyəti birinci yeri ADU Konfutsi İnstitutunun üzvü Çen Qianqiuya “Vanjiang” əsərini ifa etdiyinə görə verib. İkinci yeri Sinq Tao, Fanq Tinq və Aman Duman bölüşüblər. Altı iştirakçı üçüncü yeri tutub, daha on nəfər isə yüksək nailiyyətlərinə görə mükafatlandırılıb.
Müsabiqənin məqsədi Çin mədəniyyətini musiqi vasitəsilə daha da təbliğ etmək, iştirakçılara dil və mədəni maneələri dəf etməyə imkan yaratmaq, Azərbaycan və Çinin mədəni irsinə qarşılıqlı anlaşmanı və hörməti gücləndirmək olub.
