Milli Məclisin plenar iclasında “Azərbaycan Respublikası Hökuməti ilə Türkiyə Respublikası Hökuməti arasında təhsil sahəsində əməkdaşlıq haqqında 2017-ci il 31 oktyabr tarixli Sazişə Əlavə Protokol”un təsdiq edilməsi barədə Azərbaycan Respublikası qanununun layihəsi müzakirə olunub.
“Tehsil365” in məlumatına görə, Elm və təhsil komitəsinin sədri Anar İsgəndərov layihə barədə məlumat verib.
Komitə sədri Fazil Mustafa çıxışında onu narahat edən məsələlərə toxunub:
“Reallıq budur ki, illərdir bu istiqamətdə çoxsaylı protokollar imzalansa da, məsələn, Türkiyə-Azərbaycan Universitetinin yaradılmasına nail ola bilməmişik. Bu barədə ciddi düşünməliyik”.
F.Mustafa bildirib ki, iki ölkə arasında bütün sahələrdə uğurlarımız olsa da, təhsildə, xüsusilə praktiki tətbiq sahəsində, nəzərdə tutulan layihələri reallaşdıra bilmirik:
“Əslində, peşə təhsili baxımından müqavilə bağlamalı olduğumuz əsas tərəfdaş ölkələr bəlkə də Almaniya və digər Avropa ölkələridir. Çünki bu ölkələrdə peşə təhsili müasir texnologiyalarla və əmək bazarının tələblərinə uyğun şəkildə təşkil olunur. Qeyd edim ki, bir çox aparıcı kadrlarımız – xüsusilə filologiya sahəsində – Türkiyədə təhsil alıblar. Bir dövr Türkiyənin universitet sistemi daha inkişaf etmişdi. Təəssüf ki, bu gün Türkiyə məktəbləri demək olar ki, Azərbaycan təhsil sistemindən çıxıb və onların bərpası istiqamətində ciddi addımlar atılmalıdır. Bu məsələyə xüsusilə Vətən müharibəsindən sonra yaradılmış mühitdə önəm verilməlidir. Digər tərəfdən, biz rusdilli təhsillə bağlı müəyyən çətinliklər yaşayırıq, - müəllim çatışmazlığı və keyfiyyət problemi var. Lakin heç olmasa dil və mentalitet baxımından bizə yaxın olan Türkiyə təhsil sisteminin Azərbaycanda daha geniş təmsil olunması üçün addımlar atılmalıdır”.
Komitə sədri vurğulayıb ki, bir zamanlar Atatürk məktəbi və digər türk liseyləri çox populyar idi və böyük fayda verirdilər:
“Təəssüf ki, maliyyə çatışmazlığı səbəbindən onların fəaliyyətini davam etdirmək mümkün olmadı. Halbuki bu məktəblər vətəndaşlara alternativ seçim imkanı verirdi – nə ideoloji təzyiq, nə də yad təhsil sistemi – qardaş ölkənin təcrübəsi idi. Əgər biz cəbhədə bir yerdə mübarizə aparırıqsa, məktəbdə, peşə təhsilində və ali təhsildə də birlikdə olmalıyıq və bu istiqamətdə inkişaf etməliyik”.