13 noyabr 2025-ci il tarixində Əliabad İki Nömrəli Məktəbin 5-ci sinif şagirdləri üçün "Tanınmış şəxsiyyətlər" mövzusunda növbəti açıq dərs təşkil olundu.
"Tehsil365" xəbər verir ki, Dərsin mövzusu Azərbaycanın görkəmli bəstəkarı və musiqişünası Üzeyir Hacıbəylinin həyatı və yaradıcılığı idi.
Dərsi R.Türkan müəllimə aparmış, şagirdlərə Üzeyir Hacıbəylinin musiqi irsinin zənginliyi, Azərbaycan musiqisinin inkişafındakı rolu barədə geniş məlumat vermişdir. Dərs zamanı həmçinin bəstəkarın ən məşhur əsərləri, onun musiqidə inqilabi yenilikləri və milli musiqi ənənələrini qoruyub inkişaf etdirməsi barədə söhbət açılmışdır.
R.Türkan müəllimə şagirdlərin mövzu ilə bağlı suallarını cavablandırmış, interaktiv metodlardan istifadə etməklə onların dərsə marağını artırmışdır. Dərsdə həmçinin bəstəkarın həyatını və yaradıcılığını əks etdirən videoçarxlar nümayiş etdirilmiş, şagirdlərə mövzunu daha yaxşı mənimsəmək üçün müxtəlif tapşırıqlar verilib.
Açıq dərsin məqsədi gənc nəsildə milli musiqi və mədəniyyət irsinə sevgi hissi yaratmaq, tanınmış şəxsiyyətlərin həyat və yaradıcılığından nümunə götürərək vətənpərvərlik ruhunu artırmaqdır. Dərs müvəffəqiyyətlə keçmiş, şagirdlərin fəallığı və marağı müşahidə olunmuşdur.
Məktəb rəhbərliyi və müəllim heyəti belə tədbirlərin davamlı təşkil olunmasının önəmini vurğulayır və şagirdlərin zəngin biliklərə yiyələnməsi üçün mütəmadi olaraq faydalı və maraqlı dərslərin keçirilməsi istiqamətində işlərini davam etdirir.