“Angel and Devil” əsərinin müəllifi, Anya Yakar ləqəbi ilə tanınan gənc yazıçı Subiya İsmayılova ilə reportaj həyata keçirilib.
"Tehsil365" xəbər verir ki, Reportaj zamanı müəllifə yaradıcılıq planları, yeni əsərlə bağlı düşüncələri və yazı prosesi haqqında suallar ünvanlanıb.
Yazıçı yeni əsər yazmaq istəyib-istəmədiyi ilə bağlı sualı cavablandırarkən bildirib ki, gələcəkdə sevgi romanı yazmaq niyyətindədir. Onun sözlərinə görə, bu əsər iki gəncin bir-biri ilə təsadüfi qarşılaşması nəticəsində yaranan sevgi hekayəsi üzərində qurulacaq.
Subiya İsmayılova yeni əsərində hadisələrin xarici bir məkanda cərəyan etməsini planlaşdırdığını deyib. Lakin hələlik konkret hansı ölkə və ya şəhəri seçəcəyi barədə dəqiq qərara gəlmədiyini vurğulayıb. Müəllif hazırda üzərində işlədiyi kitabın fantastika və realizm janrlarının qarışığı olduğunu və bu janrda yazmağın kifayət qədər çətinlik yaratdığını qeyd edib. Onun sözlərinə görə, bəzən bir bölmə üzərində dəfələrlə düzəliş etməli olur.
Reportajın sonunda yazıçı oxucularını sevindirən bir açıqlama da verib. O, gələcək sevgi romanının xoşbəxt sonluqla bitəcəyini bildirib.
Qeyd edək ki, Anya Yakar ləqəbi ilə tanınan Subiya İsmayılova gənc yaşına baxmayaraq oxucuların marağını çəkən əsərləri ilə seçilir və yaradıcılıq fəaliyyətini davam etdirir.