Azərbaycan Dillər Universitetində (ADU) universitetin Tələbələrlə iş və tədbirlərin təşkili şöbəsinin və Nəsimi Rayon Polis İdarəsinin birgə təşkilatçılığı ilə “Narkomaniyaya yox deyək” mövzusunda maarifləndirici tədbir keçirilib.
Universitetdən “Tehsil365”ə verilən məlumata görə, tədbirdə Nəsimi Rayon Polis İdarəsinin rəisi, polis polkovniki Vüqar Ağayev və idarənin əməkdaşları və tələbələr iştirak ediblər.
Tədbirdən öncə Nəsimi Rayon Polis İdarəsinin rəisi Azərbaycan Dillər Universitetinin rəhbərliyi ilə görüş keçirib. Daha sonra universitetin tələbələri ilə maarifləndirici görüş təşkil olunub.
Tədbiri giriş sözü ilə açan universitetin Tədris məsələləri üzrə prorektoru vəzifəsini icra edən Şəfəq Şahməmmədova gənclərin zərərli vərdişlərdən uzaq durmasının və sağlam həyat tərzinin təbliğinin vacibliyindən danışıb.
Daha sonra çıxış edən Nəsimi Rayon Polis İdarəsinin rəisi, polis polkovniki Vüqar Ağayev narkomaniyanın yaratdığı fəsadlardan, onun cəmiyyətə və xüsusilə gənclərə vurduğu ciddi zərərlərdən danışıb. O, yetkinlik yaşına çatmayanların və gənclərin zərərli vərdişlərdən qorunması istiqamətində həyata keçirilən profilaktik tədbirlər, şəxsi təcrübəsinə əsaslanan real nümunələr, eləcə də kibercinayətkarlığa qarşı aparılan maarifləndirmə işləri barədə ətraflı məlumat verib.
Tədbir tələbələri maraqlandıran sualların cavablandırılması ilə davam edib, həmçinin mövzu ətrafında fikir mübadiləsi aparılıb.
Tədbirin sonunda narkomaniyanın fəsadlarını əks etdirən videoçarx nümayiş olunub.
