Azərbaycan Kinematoqrafçılar İttifaqının üzvü, tanınmış animator rəssam Zema Əhədova 27 dekabr 1970-ci ildə Abxaziyada anadan olub.
"Tehsil365" xəbər verir ki,O, Aleksandr Konstantinoviç Şervaşidze adına Suxumi Rəssamlıq Məktəbini bitirərək rəssamlıq sənətinin sirlərini öyrənib. 1990-1991-ci illərdə Suxumi studiyasında animasiya rəssamı kimi fəaliyyətə başlayıb.
1991-1992-ci illərdə SSRİ Dövlət Teleradio Verilişləri Komitəsi nəzdində Fyodr Xitrukun animator-rəssamlıq kursunu uğurla başa vurub. 1992-ci ildən Azərbaycan vətəndaşı olan Zema Əhədova, həyat yoldaşı Cavid Əhədovla birlikdə "Birlik" studiyasının yaradıcı qrupunun üzvüdür. Bu studiya Azərbaycanda cizgi filmi istehsal edən yeganə qurumdur və Zema xanım milli animasiya sahəsində böyük xidmətlər göstərib.
O, "Ad günü" (1992), "Zəka yatarsa" (1996), "Mina" (1998), "Mərhəmətin dadı" (2007), "Nuş olsun!" (2008), "Xeyirxah kirpi" (2009), "Müzür" (2011), "Köhnə saat" (2014), "Səmada şəkil" (2012), "Mənə nağıl söylə" (2020) kimi bir çox animasiya filmlərində iştirak edib.
Zema Əhədovanın yaradıcılığı milli animasiya sənətinin inkişafında xüsusi yer tutur.