İsveçrənin bir neçə bölgəsində dövlət məktəblərində qız şagirdlərin hicab kimi tanınan baş örtüyü geyinməsini qadağan etmək təşəbbüsləri irəli sürülüb.
“Tehsil365” xəbər verir ki, bu barədə "Die Neue Zürcher Zeitung" nəşri məlumat yayıb.
Sürixdə ölkənin ən böyük siyasi təşkilatı olan İsveçrə Xalq Partiyası məsələ ilə bağlı referendum üçün imza toplamağa hazırlaşır.
Partiya federal qadağa və sərt sanksiyaların tətbiq olunmasında israr edir.
Məsələn, qadağanı dəfələrlə pozan 16 yaşdan kiçik qızlar məktəbdən xaric edilə, valideynləri isə İsveçrədə yaşayış icazələrindən məhrum oluna bilərlər.
Məlumata görə, bu ilin əvvəlində yerli müsəlman qadınların ictimai yerlərdə üzünü tamamilə gizlədən geyim və digər əşyalar, o cümlədən çadra və niqab geyinməsi artıq qadağan olunub.