Bakı Dövlət Universiteti (BDU) 31 Dekabr – Dünya Azərbaycanlılarının Həmrəyliyi Günü və qarşıdan gələn Yeni il münasibətilə Azərbaycan xalqını və dünya azərbaycanlılarını təbrik edib.
Universitetdən “Tehsil365” verilən xəbərə görə, milli birlik və həmrəylik hər bir xalqın güc mənbəyi, inkişafının və qələbələrinin əsas şərtidir. Qeyd olunub ki, 31 Dekabr xalqımızın tarixində xüsusi əhəmiyyətə malik günlərdən biridir və bu bayram dünyanın müxtəlif ölkələrində yaşayan azərbaycanlıları vahid məqsəd ətrafında birləşdirir.
Xatırladılıb ki, Ümummilli Lider Heydər Əliyevin təşəbbüsü ilə 1991-ci il dekabrın 31-i Dünya Azərbaycanlılarının Həmrəyliyi Günü elan olunub və 1992-ci ildən etibarən bu əlamətdar tarix dövlət səviyyəsində qeyd edilir. Ulu Öndərin dünya azərbaycanlılarının milli birliyinin möhkəmləndirilməsi istiqamətində apardığı siyasətin bu gün də uğurla davam etdirildiyi vurğulanıb.
Paylaşımda Prezident İlham Əliyevin rəhbərliyi ilə diaspor quruculuğu sahəsində mühüm addımların atıldığı, Dünya Azərbaycanlılarının qurultaylarının keçirildiyi və bu prosesin milli həmrəyliyin daha da güclənməsinə xidmət etdiyi qeyd edilib.
Bildirilib ki, 44 günlük Vətən müharibəsində qazanılan tarixi Qələbə Azərbaycan xalqının sarsılmaz milli birliyinin və həmrəyliyinin bariz nümunəsidir. Azərbaycanın suverenliyinin tam bərpa olunması məhz dövlət–xalq birliyinin nəticəsi kimi dəyərləndirilib.
Sonda Bakı Dövlət Universitetinin kollektivi 31 Dekabr – Dünya Azərbaycanlılarının Həmrəyliyi Günü və qarşıdan gələn Yeni 2026-cı il münasibətilə Azərbaycan xalqına sülh, əmin-amanlıq, rifah və uğurlar arzulayıb.