3 yanvar Azərbaycan elmi ictimaiyyəti üçün əlamətdar gündür. Bu gün görkəmli alim, tarix üzrə elmlər doktoru, professor Fərid Urxan oğlu Ələkbərlinin anadan olduğu gündür.
"Tehsil365" xəbər verir ki, O, 1964-cü il yanvarın 3-də Kirovabad şəhərində (indiki Gəncə) dünyaya gəlmişdir.
Fərid Ələkbərli Azərbaycanın tibb tarixi sahəsində ən nüfuzlu tədqiqatçılarından biri olub. O, Azərbaycan Tibb Tarixçiləri Birliyinin prezidenti, Beynəlxalq Tibb Tarixi Cəmiyyətinin (ISHM) İdarə Heyətinin üzvü kimi beynəlxalq elmi dairələrdə də tanınmışdır. Alim, həmçinin AMEA-nın Məhəmməd Füzuli adına Əlyazmalar İnstitutunda Əlyazmaların və əski çap kitablarının tərcüməsi və çapa hazırlanması şöbəsinin müdiri vəzifəsində çalışmışdır.
Professor Fərid Ələkbərli qədim və orta əsr Azərbaycan əlyazmalarının tədqiqi, tərcüməsi və elmi dövriyyəyə daxil edilməsi sahəsində mühüm işlər görmüşdür. Onun araşdırmaları Azərbaycan tibb və mədəniyyət tarixinin öyrənilməsinə dəyərli töhfələr vermişdir.
Alim 2021-ci il aprelin 7-də vəfat etsə də, onun elmi irsi və tədqiqatları bu gün də elmi ictimaiyyət və gənc tədqiqatçılar üçün mühüm mənbə olaraq qalır.