Azərbaycan kinosunun görkəmli simalarından biri olan operator və rejissor Nizami Abbas bir çox yaddaqalan sənədli və bədii filmlərə quruluş verərək ölkənin kino salnaməsində mühüm yer tutub.
"Tehsil365" xəbər verir ki, Onun rejissor kimi imzası olan filmlər sırasında “Meydan” (1989), “Sərhəd” (1990), “Axırıncı addım” (1989), “Azadlığa gedən yollar” (1990), “Qəm karvanı” (1990), “Elan olunmamış müharibə” (1994), “Pəhləvan komandir” (2015) və digər ekran işləri yer alır.
1992-1998-ci illərdə Azərbaycan Respublikası Müdafiə Nazirliyinin “Sənədli Filmlər Kino-Telestudiyası”nın bədii rəhbəri vəzifəsində çalışan Nizami Abbas ölkənin hərbi kino arxivinə dəyərli töhfələr verib. O, yalnız rejissor deyil, həm də hadisələrin bilavasitə iştirakçısı kimi ön cəbhədə — Qarabağ döyüş bölgələrində çəkiliş aparmaqla real qəhrəmanlıq nümunəsi göstərib.
1990-cı ilin meydan hadisələri və azadlıq mübarizəsi fonunda “Azərbaycanfilm”in kollektivi də proseslərə biganə qalmayıb. Ramiz Fətəliyevin rəhbərliyi ilə Nizami Abbas və operator heyəti 18 gün ərzində xalq hərəkatının rəmzinə çevrilən “Meydan” filmini ərsəyə gətiriblər. Bu film təkcə sənədli salnamə deyil, həm də milli azadlıq hərəkatının canlı şahidi kimi böyük dəyərə malikdir.
Nizami Abbasın sənətkarlığı onun yalnız texniki peşəkarlığında deyil, həm də vətənpərvərliyində və tarixi yaddaşın qorunmasına verdiyi töhfədə öz əksini tapır. Onun fəaliyyəti Azərbaycan sənədli kinosunun inkişafında mühüm mərhələlərdən biri hesab olunur.