5 yanvar 1884-cü ildə mədəniyyət beşiyi sayılan Şuşada dünyaya gələn Əhməd Bəşir oğlu Bədəlbəyli (Ağdamski) Azərbaycan musiqi sənətində özünəməxsus iz qoymuş görkəmli opera müğənnisidir.
"Tehsil365" xəbər verir ki, O, tanınmış bəstəkar Üzeyir Hacıbəylinin xalası oğlu olmaqla yanaşı, həm də milli musiqi irsinin formalaşmasında əvəzsiz xidmətlər göstərmiş sənətkarlardandır.
Əhməd Ağdamski milli operanın ilk dövrlərində qadın rollarını ifa edən kişi müğənnilərdən biri kimi tarixə düşüb. Onun səhnə fəaliyyəti, xüsusilə Üzeyir Hacıbəylinin əsərlərindəki çıxışları tamaşaçılar tərəfindən böyük rəğbətlə qarşılanıb və həmin dövrün musiqi həyatına dinamika gətirib.
1943-cü ildə ona Azərbaycan SSR Əməkdar İncəsənət Xadimi fəxri adı verilib. Bu, onun milli musiqimizin inkişafına verdiyi töhfələrin dövlət səviyyəsində tanınmasının göstəricisi idi.
1 aprel 1954-cü ildə Ağdaşda vəfat edən Ağdamski bu gün də Azərbaycan musiqi tarixində pioner sənətkarlardan biri kimi xatırlanır. Onun irsi, milli opera sənətinin təməl daşlarından biri kimi dəyərləndirilir.