5 yanvar 1924-cü ildə Bakının Zabrat qəsəbəsində dünyaya gələn Nemətova Məşədixanım Sədulla qızı Azərbaycan elminin inkişafında silinməz iz qoymuş görkəmli alimlərdən biridir.
"Tehsil365" xəbər verir ki, O, tarix elmləri doktoru, epiqrafist və şərqşünas kimi uzun illər ərzində Azərbaycan və Şərq mədəniyyətinin tədqiqinə mühüm töhfələr vermişdir.
Epiqrafiya və orta əsrlər abidələri üzrə ixtisaslaşmış Nemətova, xüsusilə Azərbaycanda orta əsr kitabə və yazılı abidələrin öyrənilməsi sahəsində aparıcı mütəxəssislərdən biri kimi tanınırdı. Onun elmi araşdırmaları milli tarixşünaslığın zənginləşməsində mühüm rol oynamış, Azərbaycan və Şərq aləminin mədəni irsinin sistemli şəkildə öyrənilməsinə xidmət etmişdir.
1969-cu ildə tarix elmləri doktoru elmi dərəcəsini, 2001-ci ildə isə AMEA-nın müxbir üzvü adına layiq görülmüş alim, həm də bir çox elmi əsərlərin, monoqrafiyaların müəllifi olmuşdur.
Məşədixanım Nemətova 26 dekabr 2016-cı ildə Bakı şəhərində vəfat etmişdir. O, peşəkarlığı, zəhməti və elmi fəaliyyətilə Azərbaycanın humanitar elmlər sahəsində sayılıb-seçilən simalarından biri kimi yadda qalmışdır.