Naxçıvan Dövlət Universitetinin Tibb fakültəsində tibb üzrə fəlsəfə doktoru Sabir Novruzovun 85 illik yubileyinə həsr olunmuş tədbir keçirilib.
“Tehsil365” xəbər verir ki, tədbiri universitetin rektoru Elbrus İsayev açaraq yubilyarı təbrik edib, onun təhsil və tibb sahəsindəki uzunmüddətli və səmərəli fəaliyyətini yüksək qiymətləndirib. Rektor qeyd edib ki, Sabir Novruzovun illər ərzində apardığı elmi-pedaqoji fəaliyyət, zəngin təcrübə və elmi nailiyyətlər onu universitet və tibb ictimaiyyəti üçün nümunəvi şəxsiyyətə çevirib.
Universitetin elm və innovasiya məsələləri üzrə prorektoru Elsəvər Əsədov çıxışında yubilyarı əlamətdar 85 illik yubileyi münasibətilə təbrik edərək, Sabir Novruzovun zəngin elmi irsi və pedaqoji fəaliyyətinin gənc tədqiqatçılar və həkimlər üçün örnək olduğunu vurğulayıb.
Tibb fakültəsinin dekanı (həvalə) Şəfiqə Süleymanova çıxış edərək Sabir Novruzovun elmi nailiyyətlərindən bəhs edib. Bildirilib ki, yubilyar Naxçıvan MSSR Ali Sovetinin fəxri fərmanı, “SSRİ Səhiyyə əlaçısı” döş nişanı, Azərbaycan Respublikası Səhiyyə Nazirliyinin fəxri fərmanı ilə təltif olunub və 1980-ci ildə Naxçıvan MR əməkdar həkimi adına layiq görülüb.
Tədbirdə həmçinin “Klinik fənlər və hərbi tibb” kafedrasının müdiri Gültəkin Əliyeva, kafedranın dosentləri İsa Abdullayev, Elmar Rzayev və digər çıxışçılar Sabir Novruzovun zəngin elmi fəaliyyəti, yüksək pedaqoji bacarıqları və gənc həkimlərin yetişməsindəki xüsusi rolundan danışıblar.
Yubilyar göstərilən diqqət və qayğıya görə tədbir iştirakçılarına minnətdarlığını bildirib.
Sonda universitetin rektoru Elbrus İsayev tərəfindən Sabir Novruzova Naxçıvan Dövlət Universitetinin “Fəxri Fərmanı” təqdim olunub, həmçinin fakültə kollektivi adından yubilyara hədiyyə verilib.
