2025-ci il dekabrın 26-da Siyasi elmlər və fəlsəfə departamentinin müdiri, dosent Orxan Vəliyev AnewZ kanalında Andi Miocun aparıcılığı ilə yayımlanan “Azərbaycan xarici siyasətinin icmalı” (“Azerbaijan Foreign Policy in Review”) mövzusunda verilişin qonağı olub.
“Tehsil365” xəbər verir ki, veriliş zamanı dosent Orxan Vəliyev 2025-ci ilin Azərbaycan xarici siyasəti baxımından mühüm nailiyyətlərlə yadda qaldığını bildirib. O, xüsusilə Əbu-Dabi görüşü və Vaşinqton deklarasiyasını önəmli siyasi uğurlar kimi dəyərləndirib. Dosent qeyd edib ki, Əbu-Dabi görüşünün Azərbaycan və Ermənistan arasında ikitərəfli formatda keçirilməsi xüsusi əhəmiyyət daşıyır və bu, Azərbaycanın uzun müddətdir nail olmağa çalışdığı əsas məsələlərdən biri olub.
Dosent Orxan Vəliyevin sözlərinə görə, digər mühüm nailiyyət Vaşinqton deklarasiyası və ya Vaşinqton sammitidir. O, bu sənədi davamlı sülhə aparan sonuncu addım kimi qiymətləndirərək vurğulayıb ki, sənədin Azərbaycan və Ermənistan tərəfindən ABŞ-la birgə imzalanması sülh prosesinə əlavə təminat kimi dəyərləndirilə bilər.