2025-ci il dekabrın 26-da Xəzər Universitetində Tarix və arxeologiya departamenti ilə Türkçü Düşüncə Birliyinin birgə təşkilatçılığı ilə “Beşinci Türkçülük Çalışmaları” adlı elmi konfrans keçirilib. Konfrans “Milli və çağdaş təhsil gərəyi” mövzusuna həsr olunub və müasir təhsil sistemlərinin milli dəyərlər və çağdaş elmi yanaşmalar kontekstində dəyərləndirilməsi əsas diqqət mərkəzində saxlanılıb.
“Tehsil365” xəbər verir ki, konfransın açılışında Tarix və arxeologiya departamentinin müdiri, dosent Telman Nüsrətoğlu çıxış edərək iştirakçıları salamlayıb, tədbirin elmi və ictimai əhəmiyyətini vurğulayıb.
Konfransın əsas məruzələrindən biri Xəzər Universitetinin təsisçisi, Direktorlar və Qəyyumlar Şurasının sədri, professor-akademik Hamlet İsaxanlı tərəfindən “Dünyada təhsil: antik dövrdən günümüzədək” mövzusunda təqdim olunub. Məruzədə ali təhsilin tarixi inkişaf mərhələləri sistemli şəkildə təhlil edilib, Platonun Akademiyası, Aristotelin Liseyi, İskəndəriyyə Kitabxanası, İslam dünyasında isə Beytül-Hikmə və Nizamiyyə mədrəsələrinin ali təhsilin formalaşmasındakı rolu xüsusi qeyd olunub.
Məruzədə həmçinin Avropada universitetlərin yaranması, diplom və elmi dərəcə sistemlərinin təşəkkülü, Almaniyada formalaşmış Humboldt modelinin ali təhsildə yaratdığı dönüş, eləcə də ABŞ ali təhsil modelinin əsas xüsusiyyətləri ətraflı şərh edilib. Hamlet İsaxanlı müasir ali təhsilin milli-mədəni dəyərlərə söykənməklə yanaşı, qlobal elmi standartlara uyğun inkişaf etməsinin vacibliyini vurğulayıb və bu kontekstdə Xəzər Universitetinin təhsil sahəsindəki mövqeyinə diqqət çəkib.
Konfransda professor Dr. Nəsib Nəsibli, Böyükağa Mikayıllı, Dr. Aygül İsayeva, dosent Aynur Qəzənfərqızı, Yasəmən Qaraqoyunlu, Dr. Limunət Əmrahlı, professor Dr. Ədalət Tahirzadə, Dr. Odər Qutluər və dosent Dr. Faiq Ələkbərli müxtəlif mövzularda məruzələrlə çıxış ediblər. Məruzələrdə türkçülük düşüncəsi, milli ideologiya, tarix, mədəniyyət və təhsil problemləri elmi müstəvidə müzakirə olunub.
Konfrans sonda fəal müzakirələrlə yekunlaşıb, milli və çağdaş təhsil məsələləri ətrafında səmərəli fikir mübadiləsi aparılıb.
