“Cənab Prezident İlham Əliyevin yerli televiziya kanallarına verdiyi müsahibədə Azərbaycan dili ilə bağlı səsləndirdiyi fikirlər təsadüfi deyil və bu çağırışlar sadəcə mədəni mövqe deyil, milli təhlükəsizlik məsələsi kimi qiymətləndirilməlidir.”
Bu fikirləri “Tehsil365”ə açıqlamasında Təhsil İşçilərinin Həmrəyliyi Alyansının sədri, təhsil eksperti Əmrah Həsənli bildirib.
Onun sözlərinə görə, Prezident açıq şəkildə vurğulayıb ki, Azərbaycan dili milli kimliyimizin əsas dayağıdır və bu dili qorumaq təkcə dövlətin deyil, hər bir azərbaycanlının borcudur.
Əmrah Həsənli qeyd edib ki, Azərbaycan böyük xalqdır, zəngin tarixə və mədəniyyətə malikdir və böyük xalqın böyük məsuliyyəti olur. Prezidentin xüsusi olaraq diqqət çəkdiyi məsələlərdən biri də xaricdə yaşayan azərbaycanlıların ana dilimizi məişət səviyyəsində deyil, mükəmməl səviyyədə bilməsinin vacibliyidir. Bu baxımdan dünyanın müxtəlif ölkələrində Azərbaycan məktəblərinin və onlayn tədris platformalarının yaradılması ideyası strateji və uzaqgörən yanaşma kimi dəyərləndirilməlidir.
Açıqlamada vurğulanıb ki, dilin qorunması yalnız dərslik və ya qanunla mümkün deyil. Dil ailədə başlayır, məktəbdə möhkəmlənir, cəmiyyətdə isə yaşadılır. Əgər valideynlər evdə övladları ilə yad sözlərin qarışdığı, yarımçıq və deformasiyaya uğramış dildə danışırlarsa, gələcəkdə məktəbdən və ya dövlətdən mükəmməl dil mühiti gözləmək düzgün olmaz.
Əmrah Həsənli bildirib ki:
“Xarici dilləri bilmək müasir dünyanın tələbidir və bu, böyük üstünlükdür. Lakin ana dilini yad sözlərin təsiri altına salmaq tamamilə fərqli və təhlükəli prosesdir. Onun sözlərinə görə, sosial mediada, reklam lövhələrində, televiziya proqramlarında və hətta rəsmi çıxışlarda Azərbaycan dilinin imkanları olduğu halda xarici kəlmələrdən istifadə edilməsi dilin ruhunu zəiflədir və bu proses səssiz şəkildə milli kimliyə zərbə vurur.”
Müsahib qeyd edib ki, Prezidentin səsləndirdiyi fikirlər hər bir vətəndaş üçün ciddi xəbərdarlıqdır. Dilin qorunması radikal yanaşma deyil, milli şüurun göstəricisidir. Azərbaycan dilində səlis, düzgün və zəngin danışmaq utanc yox, qürur mənbəyi olmalıdır. Xüsusilə müəllimlər, jurnalistlər, ictimai xadimlər və valideynlər bu məsələdə daha böyük məsuliyyət daşıyırlar.
Sonda Əmrah Həsənli vurğulayıb ki:
“Bu gün Azərbaycan dili qorunmazsa, sabah milli kimliyi qorumaq çətinləşəcək. Azərbaycan dili sadəcə ünsiyyət vasitəsi deyil — tariximiz, yaddaşımız və gələcəyimizdir. Prezidentin bu çağırışı hər kəsi düşünməyə vadar etməlidir: dilə necə yanaşırıq və onu gələcək nəsillərə hansı formada ötürürük?”
Onun fikrincə, Azərbaycan dilinin qorunması tək dövlətin deyil, hər bir Azərbaycan vətəndaşının borcudur və bu borcun yerinə yetirilməsi gündəlik danışıq dilindən başlayır.