2 Fevral – Azərbaycan Gəncləri Gününə həsr olunmuş və ənənəvi olaraq keçirilən “İlin gənc alimi” müsabiqəsi elan olunub.
“Tehsil365” xəbər verir ki, müsabiqənin əsas məqsədi Bakı Dövlət Universitetinin (BDU) yaşı 35-dək olan, il ərzində aktiv elmi fəaliyyət göstərərək yüksək nəticələr əldə etmiş magistrant, doktorant və əməkdaşlarının mükafatlandırılmasıdır.
Müsabiqə çərçivəsində təsir (impakt) faktorlu, nüfuzlu beynəlxalq bazalarda indekslənən jurnallarda dərc olunmuş elmi məqalələri, digər elmi əsərləri olan, elmi işlərinə istinad edilən və yüksək elmi-təşkilati fəaliyyəti ilə fərqlənən gənc alimlər qiymətləndiriləcək.
Mükafatlandırma
Müsabiqə üzrə qaliblər 2 nominasiya üzrə “İlin gənc alimi” adına layiq görüləcək, diplom və pul mükafatları ilə təltif olunacaqlar:
Təbiət-dəqiq və texnika elmləri üzrə – 1 mükafat (2 000 manat);
Humanitar və ictimai elmlər üzrə – 1 mükafat (2 000 manat).
İştirak şərtləri
Müsabiqədə iştirak etmək üçün 2025-ci ildə:
təbiət-dəqiq və texnika elmləri üzrə ən azı 1 məqalənin Web of Science və/və ya Scopus bazalarına daxil olan jurnallarda;
humanitar və ictimai elmlər üzrə isə ən azı 1 məqalənin Web of Science, Scopus, ERIH PLUS, Philosopher's Index, Copernicus, Ulakbim, PsycINFO, EconLit və digər nüfuzlu beynəlxalq indeksləmə sistemlərinə daxil olan jurnallarda dərc olunması tələb olunur.
Təqdim olunmalı sənədlər
İddiaçılar aşağıdakı sənədləri təqdim etməlidirlər:
2025-ci ildə dərc olunmuş məqalələr (PDF formatda, DOI və internet linki göstərilməklə);
monoqrafiya, kitab, atlas və icmallar;
ixtira və patentlər;
elmi işlərə edilən istinadların statistikası (Scopus, Web of Science, Google Scholar və s.);
multidisiplinar və tətbiqi xarakterli elmi işlər;
respublika və beynəlxalq elmi tədbirlərdə iştirakla bağlı sənədlər;
qrant fəaliyyəti;
tədris fəaliyyəti;
elmin kütləviləşdirilməsi üzrə fəaliyyətlər;
şəxsi elmi və peşəkar platformalara (ResearchGate, Google Scholar, LinkedIn və s.) keçidlər.
Sənədlərin qəbulu
Müsabiqəyə sənədlərin qəbulu 2026-cı il 6 yanvar tarixindən başlayır və 26 yanvar saat 17:00-dək davam edəcək.
Sənədlər elektron formada [email protected] elektron ünvanına təqdim edilməlidir.
Müsabiqədə yalnız BDU-nun magistrantları, doktorantları və əməkdaşları fərdi şəkildə iştirak edə bilərlər. Kollektiv müraciətlər qəbul olunmur və hər bir elmi iş müsabiqəyə yalnız bir iddiaçı tərəfindən təqdim edilə bilər.
Qeyd olunur ki, təqdim edilən sənədlərin düzgünlüyünə görə məsuliyyəti iddiaçı daşıyır. Qaydalara uyğun olmayan və gec təqdim edilən sənədlər müsabiqəyə buraxılmayacaq.