Azərbaycan Dillər Universitetinin (ADU) İnklüziv Təhsil Mərkəzi ilə Təranə Möhsünova Disleksiya Mərkəzi arasında imzalanmış əməkdaşlıq memorandumu çərçivəsində görüş keçirilib. Görüş zamanı tərəflər arasında gələcək əməkdaşlıq perspektivləri ətraflı müzakirə olunub, inklüziv təhsilin inkişafına yönəlmiş birgə fəaliyyətlərin təşkili, könüllülük proqramlarının hazırlanması və icrası, eləcə də silsilə maarifləndirici və elmi-praktiki tədbirlərin həyata keçirilməsi məsələləri diqqət mərkəzində saxlanılıb.
“Tehsil365” xəbər verir ki, Müzakirələr zamanı İnklüziv Təhsil Mərkəzinin müdiri, dosent Nigar Zeynalova inklüziv təhsilin müasir çağırışları, disleksiya və digər öyrənmə çətinlikləri olan şəxslərin təhsil prosesinə inteqrasiyasının əhəmiyyəti barədə fikirlərini bölüşüb, bu sahədə institusional əməkdaşlığın vacibliyini vurğulayıb.
Təranə Möhsünova isə rəhbərlik etdiyi Disleksiya Mərkəzinin fəaliyyəti, əldə olunan təcrübələr və gələcəkdə birgə layihələrin həyata keçirilməsi imkanları haqqında məlumat verib, tərəflər arasında davamlı və səmərəli əməkdaşlığın inklüziv təhsilin keyfiyyətinin artırılmasına mühüm töhfə verəcəyini qeyd edib.
Görüş çərçivəsində İnklüziv Təhsil Mərkəzində mövcud olan avadanlıqlarla tanış olunub, həmin avadanlıqların təlim prosesinə inteqrasiyası və gələcək fəaliyyətlərdə istifadə imkanları müzakirə edilib.
Görüşün yekununda tərəflər əməkdaşlıq memorandumu çərçivəsində konkret fəaliyyət planının hazırlanması, birgə təlim və seminarların təşkili, tələbə və mütəxəssislərin prosesə cəlb olunması, eləcə də inklüziv təhsil sahəsində təcrübə mübadiləsinin aparılması barədə razılığa gəliblər. Qeyd olunub ki, bu əməkdaşlıq disleksiya və digər öyrənmə çətinlikləri olan şəxslərin təhsil imkanlarının genişləndirilməsinə, inklüziv təhsilin elmi-praktiki əsaslarının möhkəmləndirilməsinə mühüm töhfə verib.
