UNEC-in rektoru, professor Ədalət Muradov Avropanın aparıcı universitetlərində tədqiqatlarını başa vuraraq ölkəyə qayıdan 6 tədqiqatçı ilə görüşüb.
“Tehsil365“ xəbər verir ki,
Elm və innovasiyalar üzrə prorektor, professor Rövnəq Rzayev, “Mühəndislik və tətbiqi elmlər” kafedrasının müdiri, dosent Tural Nağıyev Belçikanın Gent Universitetində, tədqiqatçı müəllim, i.f.d. Həsrəddin Quliyev Almaniyanın Fridrix-Aleksandr Universitetində, “İqtisadiyyat” kafedrasının dosenti Suqra Hümbətova və “Riyaziyyat və statistika” kafedrasının dosenti Vüsalə Teymurova İtaliyanın Kampaniya Luigi Vanvitelli Universitetində (Università degli Studi della Campania Luigi Vanvitelli), “Mühəndislik və tətbiqi elmlər” kafedrasının dosenti Aytən Niyazova isə Türkiyənin Yıldız Texnik Universitetində apardıqları elmi tədqiqatlar barədə məlumat veriblər.
Tədqiqatçılar ezam olunduqları universitetlərdə əldə etdikləri elmi nəticələri, tədqiqat işlərinin təşkili mexanizmlərini, akademik mühitin xüsusiyyətlərini və beynəlxalq əməkdaşlıq təcrübələrini bölüşüblər. Onlar həmin təcrübənin UNEC-də tətbiqi imkanları ilə bağlı fikirlərini səsləndiriblər.
Çıxışlar zamanı beynəlxalq konfransların debat formatında təşkili, elmi tədqiqatlar üçün təkmil və əlçatan məlumat (data) bazalarının yaradılması, araşdırmaların daha çox praktiki xarakter daşıması və konkret problemlərin həllinə yönəlməsinin, prioritet mövzular üzrə doktorantların seçilməsinin əhəmiyyəti xüsusi vurğulanıb.
Bununla yanaşı, UNEC-in strateji məqsədlərinə uyğun olaraq xarici universitetlərlə davamlı və məqsədyönlü əməkdaşlıqların qurulmasının, eləcə də bu kimi elmi tədqiqatların il ərzində sistemli şəkildə davam etdirilməsinin vacibliyi qeyd olunub.