7 yanvar 2026-cı il tarixində Qax rayon Tasmalı kənd Elçin Şahmərdanov adına tam orta ümumtəhsil məktəbində “Sağlam bədəndə sağlam ruh” mövzusunda geniş maarifləndirici tədbir keçirilib.
"Tehsil365" xəbər verir ki, Tədbirin əsas məqsədi şagirdlərə sağlam həyat tərzinin önəmini çatdırmaq, fiziki və ruhi sağlamlığın qarşılıqlı əlaqəsini anlamağa kömək etmək və onları sağlam həyat vərdişlərinə təşviq etmək olub.
Tədbirdə məktəbin müəllimləri və şagirdləri fəal iştirak ediblər. İlk olaraq tədbirin təşkilatçısı mövzu ilə bağlı ətraflı çıxış edərək, sağlamlığın yalnız bədənimizin deyil, həm də ruhumuzun, zehni vəziyyətimizin sağlam olması ilə bağlı olduğunu vurğulayıb. O, sağlam həyat tərzinin əsas şərtləri, düzgün qidalanma, fiziki aktivlik, istirahət və stressdən uzaq durmağın önəmi barədə danışıb.
Daha sonra məktəbin idman müəllimi fiziki hərəkətlərin və idmanın insan sağlamlığı üçün nə qədər vacib olduğunu izah edib, gündəlik fiziki fəaliyyətlərin şagirdlərin fiziki və ruhi vəziyyətinə müsbət təsirindən bəhs edib. Müəllim həmçinin şagirdlərin hər gün idmana vaxt ayırmasının vacibliyini vurğulayıb və onların fəal həyat tərzini seçmələrini tövsiyə edib.
Tədbirin növbəti hissəsində psixoloq iştirakçılarla görüş keçirərək, ruh sağlamlığının qorunması üçün stressin idarə olunması, müsbət düşüncə tərzinin formalaşması və sosial münasibətlərin əhəmiyyəti mövzularında şagirdlərə məsləhətlər verib. O, həmçinin şagirdlərin öz duyğularını ifadə etmələri və emosional vəziyyətlərini idarə edə bilmələri üçün praktiki üsullar təqdim edib.
Tədbir zamanı şagirdlər də fikirlərini bölüşərək sağlam həyat tərzi ilə bağlı şəxsi təcrübələrini danışıb, həmçinin suallar verərək mövzu ilə bağlı maraqlarını nümayiş etdiriblər. Tədbirin sonunda sağlam həyat tərzinin təşviqi məqsədilə şagirdlərə müvafiq bukletlər və maarifləndirici materiallar paylanıb.
Qax rayon Tasmalı kənd Elçin Şahmərdanov adına tam orta məktəbin rəhbərliyi belə tədbirlərin məktəb ictimaiyyətində sağlamlıq mədəniyyətinin inkişafına böyük töhfə verdiyini bildirərək, gələcəkdə də bu istiqamətdə işlərin davam etdiriləcəyini qeyd edib.
Bu tədbir şagirdlərin həm fiziki, həm də ruhi sağlamlıqlarına diqqətin artırılması, onlarda məsuliyyət hissinin formalaşdırılması və sağlam həyat tərzinin vacibliyinin dərk olunması baxımından böyük əhəmiyyət kəsb edir.