Dövlət başçısı İlham Əliyevin yerli televiziya kanallarına verdiyi açıqlamalarda elm və təhsillə bağlı fikirləri xüsusi əhəmiyyət kəsb edir.
“Tehsil365” xəbər verir ki, Bu barədə AZƏRTAC-a müsahibəsində elm və təhsil məsələləri üzrə ekspert Elçin Əfəndi bildirib.
“Prezident İlham Əliyevin mediaya müsahibəsində demək olar ki, təhsilin bütün sferalarına toxunaraq, atılmış və atılacaq addımları sadalayıb. Nəticə ondan ibarətdir ki, biz neft-qaz ölkəsi olsaq da, gələcəyimiz elm və təhsildən asılıdır. Ölkə olaraq neft kapitalından daha çox insan kapitalına önəm verməliyik və veririk. Prezident tərəfindən illərdir ki, təhsil sahəsində müsbət islahatlar aparılır. Elm və təhsil sahəsində ölkəmizin uğurlu olması üçün vətəndaşlara təhsilin əlçatanlığının təmin olunması prioritetlərdəndir. Son dövrlərdə də biz bu istiqamətlərdə imzalanmış uğurlu sərəncam və qərarları görürük. Məsələn, Təhsil Tələbə Kredit Fondunun yaradılması, dövlət sifarişi hesabına təhsil alanların demək olar ki, müxtəlif təhsil pilələrini nəzərə almaqla 60 min nəfərdən çoxunu əhatə etməsi, gənclərin xarici ölkələrin nüfuzlu ali təhsil müəssisələrində dövlət hesabına təhsil alması, yeni-yeni məktəblərin, universitetlərin yaradılması, beynəlxalq ikili diplom proqramlarının tətbiqi, peşə təhsil müəssisələrinin yaradılması və s. bunun bariz nümunələridir”, - deyə o əlavə edib.
Bir neçə il sonra tədqiqatçılarımızın əldə etdiyi uğurların dövlətimizin və cəmiyyətimizin inkişafına mühüm töhfə verəcəyinə əminliyini bildirən ekspert vurğulayıb ki, alimlərimiz üçün yaradılan şərait onların daha səmərəli işləməsinə imkan verəcək. Bütün qeyd olunanları nəzərə aldıqda əminliklə demək olar ki, Prezident İlham Əliyev yaxın gələcək üçün deyil, uzaq gələcək üçün nikbin qərarların alınması istiqamətində maraqlıdır.
“Ölkəmizin istər iqtisadi, istər sosial, istər hüquqi və digər sahələrində neft-qaz asılılığının aradan qaldırılmasının yeganə yolu elm və təhsildən keçir. Prezident İlham Əliyev məhz bunları nəzərə alaraq daha çox təhsilə və gələcəyə yatırım etməyin doğru olduğunu diqqətə çatdırır. Uzaq gələcəyi düşünən Prezident elm və təhsil sahəsinə hər zaman diqqət və qayğı göstərməklə gələcəyimizin və gənclərimizin uğurlu, dövlətimizin qüdrətli, müstəqilliyimizin, suverenliyimizin əbədi və təminatlı olmasına çalışır”, - deyə Elçin Əfəndi bildirib.