Stenford Universitetinin alimləri yalnız bir gecəlik yuxu məlumatlarını analiz edərək 100-dən çox xəstəliyi əvvəlcədən proqnozlaşdıra bilən "SleepFM" adlı süni intellekt modelini təqdim ediblər.
Tədqiqatçılar bildiriblər ki, yeni model 65 min iştirakçıdan toplanmış təxminən 600 min saatlıq yuxu məlumatı əsasında öyrədilib.
“Tehsil365” xarici KİV-ə istinadla xəbər verir ki, "SleepFM" modeli ürək tutması, demans və müxtəlif xərçəng növləri də daxil olmaqla 130 fərqli sağlamlıq vəziyyətini yuxu siqnalları əsasında proqnozlaşdırmaq gücünə malikdir. Xüsusilə Parkinson xəstəliyi və prostat xərçəngi riskini 89 faiz, demansı isə 85 faiz dəqiqliklə müəyyən edə bilməsi diqqət çəkir.
Beyin dalğaları, ürək döyüntüsü və tənəffüs göstəricilərini birləşdirən bu sistem, insan orqanizminin yuxu zamanı verdiyi siqnallar vasitəsilə sağlamlıqla bağlı potensial problemləri erkən mərhələdə üzə çıxarmağı hədəfləyir.