Bu gün, 10 yanvar 2026-cı il, Azərbaycanın görkəmli dövlət və siyasi xadimi, sovet diplomatı Əbdürrəhman Xəlil oğlu Vəzirovun vəfatının 4-cü ildönümüdür.
"Tehsil365" xəbər verir ki, 1930-cu il mayın 26-da Bakıda anadan olmuş Əbdürrəhman Vəzirov uzun illər SSRİ diplomatik korpusunda fəaliyyət göstərmiş, 1979–1985-ci illərdə Nepalda, 1985–1988-ci illərdə isə Pakistanda SSRİ-nin fövqəladə və səlahiyyətli səfiri kimi çalışmışdır.
1988-ci ildə ölkədə gərgin ictimai-siyasi vəziyyət fonunda o, Azərbaycan Kommunist Partiyası Mərkəzi Komitəsinin 13-cü birinci katibi təyin olunmuş və bu vəzifəni 1990-cı ilə qədər icra etmişdir. Əbdürrəhman Vəzirovun hakimiyyəti dövrü Azərbaycan tarixində mürəkkəb və dəyişkən bir mərhələ ilə yadda qalmışdır.
1990-cı ildən sonra siyasi səhnədən çəkilən Vəzirov ömrünün son illərini Moskvada keçirmiş və 10 yanvar 2022-ci ildə orada vəfat etmişdir.
Əbdürrəhman Vəzirov Azərbaycan SSR tarixində mühüm dövlət və diplomatik vəzifələrdə çalışmış, ölkənin siyasi proseslərinə təsir göstərmiş simalardan biri kimi yadda qalmışdır.
Allah rəhmət eləsin!