11 yanvar 1938-ci ildə Bakıda anadan olmuş Fuad Ənvər oğlu Musayev dövlət idarəçiliyi və idman sahəsindəki fəaliyyəti ilə Azərbaycan tarixində silinməz iz qoymuş şəxsiyyətlərdəndir.
"Tehsil365" xəbər verir ki, O, uzun illər boyu mühüm dövlət və partiya vəzifələrində çalışaraq ölkənin sosial-iqtisadi inkişafında fəal rol oynamışdır.
Fuad Musayev müxtəlif illərdə Azərbaycan SSR Dövlət Plan Komitəsi sədrinin birinci müavini, kənd tikintisi nazirinin müavini, Azərbaycan Kommunist Partiyası Bakı Şəhər Komitəsinin birinci katibi, eləcə də Mərkəzi Komitənin sənaye və tikinti işləri üzrə katibi kimi yüksək vəzifələrdə fəaliyyət göstərmişdir.
Müstəqillik dövründə isə onun adı daha çox Azərbaycan Futbol Federasiyaları Assosiasiyasının (AFFA) ilk prezidenti kimi tanınır. O, futbolun ölkədə inkişafında mühüm rol oynamış, beynəlxalq idman əlaqələrinin qurulmasına töhfələr vermişdir.
Fuad Musayev 16 iyun 2017-ci ildə Moskvada vəfat etmişdir. Onun çoxşaxəli fəaliyyəti və ölkəyə xidmətləri daim hörmətlə xatırlanır.