Şəhid İsmayılzadə Zaur Nizami oğlu 29 iyul 1995-ci ildə Lənkəran rayonunun İstisu qəsəbəsində anadan olub. Valideynləri hərbçi olduğu üçün Zaur uşaqlıq illərini onlarla birlikdə Cəlilabad rayonunun Göytəpə qəsəbəsində yerləşən hərbi hissədə keçirib.
“Tehsil365" xəbər verir ki, o, 2001-ci ildə Göytəpə qəsəbəsində yerləşən Milli Qəhrəman Vüqar Mürsəlov adına tam orta məktəbə daxil olub və təhsil aldığı müddətdə nümunəvi şagird kimi tanınıb. 2012-ci ildə tam orta məktəbi bitirdikdən sonra hüquqi əsaslarla hərbi xidmətə yollanıb.
Zaur İsmayılzadə həqiqi hərbi xidmətini 2015-ci ildə başa vurduqdan sonra E saylı hərbi hissədə müddətdən artıq hərbi qulluqçu kimi xidmətə başlayıb. O, 2016-cı ilin Aprel döyüşlərində fəal iştirak edib. 2017-ci ildə səhhəti ilə əlaqədar hərbi xidmətdən azad olunub.
Sonrakı dövrdə özəl mühafizə müəssisəsində çalışsa da, Vətən sevgisi onu yenidən silaha sarılmağa vadar edib. 2020-ci ildə İkinci Vətən müharibəsi başlayanda könüllü olaraq cəbhəyə yollanıb. Şəhid Zaur İsmayılzadə 9–10 oktyabr 2020-ci il tarixlərində Füzuli uğrunda gedən ağır döyüşlərdə qəhrəmancasına şəhidlik zirvəsinə ucalıb.
O, ölümündən sonra “Vətən uğrunda” III dərəcəli orden, “Vətənə xidmətə görə”, “Cəsur döyüşçü”, “Füzulinin azad olunmasına görə” və “Şuşanın azad olunmasına görə” medalları ilə təltif edilib.
Qeyd edək ki, “Tehsil365” İnformasiya Agentliyinin layihəsi olan “Şəhidin səsi” proqramının bu dəfəki buraxılışı bu gün saat 18:00-da yayımlanacaq. Verilişin aparıcısı könüllü müxbir Fəridə Sadıqzadədir.