Bakı Mühəndislik Universiteti (BMU) ilə Çin Xalq Respublikasının nüfuzlu dövlət ali təhsil müəssisələrindən biri olan Qingdao Texnologiya Universiteti arasında onlayn görüş keçirilib.
“Tehsil365” xəbər verir ki, Qingdao Universiteti mühəndislik, texnologiya və tətbiqi elmlər sahəsində geniş akademik imkanlara malik olmaqla, Çinin aparıcı texniki ali təhsil müəssisələrindən biri kimi tanınır.
Görüş zamanı universitetlər arasında mövcud olan anlaşma memorandumundan irəli gələn məsələlərin aktiv mərhələyə keçirilməsi, mövcud əməkdaşlığın institusional əsasda genişləndirilməsi, gələcək dövrdə birgə təhsil proqramlarının həyata keçirilməsi, ikili diplom təşəbbüsləri, tələbə və akademik heyətin mübadiləsi, elmi-tədqiqat, həmçinin innovasiya yönümlü layihələr ətrafında müzakirələr aparılıb.
BMU-nun beynəlxalq əlaqələr üzrə prorektoru Ətrabə Gül son illər Çin universitetləri ilə əməkdaşlığın genişləndirilməsi istiqamətində görülən işlərə diqqət çəkib. Eyni zamanda Qingdao Texnologiya Universiteti ilə əməkdaşlığın yeni məzmunla zənginləşdirilməsinin hər iki ali təhsil müəssisəsinin akademik potensialının artırılmasına, müasir çağırışlara uyğun ixtisaslı kadr hazırlığının gücləndirilməsinə və birgə elmi nəticələrin əldə olunmasına mühüm töhfə verəcəyini bildirib.
Görüş qarşılıqlı maraq doğuran məsələlərin müzakirəsi ilə davam etdirilib və tərəflər gələcək əməkdaşlıq istiqamətləri üzrə praktiki addımların atılması barədə razılığa gəliblər.