Xəzər Universitetinin təsisçisi, Direktorlar və Qəyyumlar Şurasının sədri Prof. Akad. Hamlet İsaxanlı və İctimai Əlaqələr və Media üzrə direktor Əlövsət Əmirbəyli 6-8 yanvar 2026-cı il tarixində Ankarada işgüzar səfərdə olublar.
"Tehsil365" xəbər verir ki, səfər çərçivəsində nümayəndə heyəti bir sıra türk universitetləri və təşkilatlarla görüşlər keçirib, əməkdaşlıq imkanlarını müzakirə edib.
6 yanvar
Görüşlərə Ankara Musiqi və Güzel Sanatlar Universitetində başlanılıb. Rektor Prof. Erhan Özden ilə keçirilən görüşdə iki qardaş ölkənin universitetləri arasında əlaqələrin genişləndirilməsinin vacibliyi vurğulanıb və Xəzər Universiteti ilə Ankara Musiqi və Güzel Sanatlar Universiteti arasında anlaşma protokolu imzalanıb.
Eyni gün nümayəndə heyəti TÜRKSOY Başqan yardımçısı Sait Yusufla görüşüb. S.Yusuf təşkilatın fəaliyyəti və gələcək planları haqqında məlumat verib.
Daha sonra Ankara Sosial Bilimler Universitetinin (ASBU) rektoru Prof. Musa Arıcan Xəzər Universitetindən gələn qonaqları qəbul edib. Hər iki universitet arasında əməkdaşlığı möhkəmləndirəcək anlaşma protokolu imzalanıb. Görüşdə Azərbaycanın Türkiyədəki səfirliyinin Təhsil müşaviri Dos. Nəcibə Nəsibova, TÜRKSOY Dairə başqanı Dr. Barış Cavid Mövsümlü və digər rəsmilər iştirak ediblər.
7 yanvar
Nümayəndə heyəti Türkiyə Cumhuriyeti Anayasa Məhkəməsinin Başqanı Kadir Özkaya və üzvü Yılmaz Akçil ilə görüşüb. Görüşdə Anayasa Məhkəməsi haqqında ətraflı məlumat verilib və Xəzər Universitetinin nailiyyətlərindən danışılıb. Qonaqlar Məhkəmənin tarixi muzeyi ilə tanış olublar.
Həmin gün Hacettepe Universitetinin rektoru Prof. Mehmet Cahit Güran da nümayəndə heyətini qəbul edib. H. İsaxanlı universitetin nailiyyətləri və gələcək əməkdaşlıq imkanları haqqında danışıb, qarşılıqlı əməkdaşlığın vacibliyi vurğulanıb.
8 yanvar
Nümayəndə heyəti Qazi Universitetinin rektoru Prof. Uğur Ünal ilə görüşüb. H. İsaxanlı universitetlərarası əməkdaşlıqdan məmnunluğunu ifadə edib, gələcək planlardan danışıb. Ü. Ünal isə Xəzər Universiteti ilə əməkdaşlığı yüksək qiymətləndirərək, H. İsaxanlıya yeni kitablarını hədiyyə edib.
Eyni gün Ankara Universitetinin rektoru Prof. Necdat Ünivar nümayəndə heyətini qəbul edib. Görüş zamanı iki universitet arasında əlaqələrin genişləndirilməsi vurğulanıb və qonaqların şərəfinə universitet tərəfindən ziyafət təşkil olunub.
Səfərin sonuncu görüşü Orta Doğu Teknik Universitetində keçirilib. Rektor Prof. Ahmet Yozgatlıgil qonaqları səmimi qarşılayıb, universitetin fəaliyyəti haqqında məlumat verib və iki universitet arasında əməkdaşlığın gücləndirilməsinin vacibliyi qeyd olunub.
Səfər müddətində görüşlərdə hədiyyələr təqdim olunub və xatirə şəkilləri çəkilib.