Təkrar istifadə olunan su şüşələrindən istifadə, ekoloji baxımdan faydalı vərdiş hesab olunsa da, düzgün qulluq edilmədikdə bu aksesuar immun sisteminə zərər verə bilər.
“Tehsil365” "Associated Press" agentliyinə istinadən xəbər verir ki, Pittsburq Universitetinin Tibb Mərkəzi və Beylor Kollecinin mütəxəssisləri sadəcə butulkanı yaxalamağın niyə kifayət etmədiyini və butulkanın materialının sağlamlıq risklərinə necə təsir göstərdiyini izah ediblər.
Tibb bacısı Miçel Knepper xəbərdarlıq edir ki, butulka gigiyenasına laqeyd yanaşmaq yalnız mədə-bağırsaq pozuntularına deyil, həm də boğazda qaşınma kimi spesifik əlamətlərə səbəb ola, allergiya və astmanın kəskinləşməsini törədə bilər.
Bakteriyalar şüşənin içinə ağızdan və yuyulmamış əllərdən düşür və xüsusilə çətin təmizlənən yerlərdə - qapağın yivlərində, klapanlarda və borucuq hissələrində toplanır.
Mütəxəssislər material fərqinə xüsusi diqqət çəkirlər: plastik butulkalar, şüşə və ya metal olanlara nisbətən daha risklidir. Plastik daxildən daha asan cızılır və bu mikrozədələr mikroblar üçün ideal "sığınacaqlara" çevrilir, onları yumaq isə xeyli çətin olur.
Gündəlik qulluq üçün isti sabunlu su və butulka üçün xüsusi fırça ilə mexaniki təmizləmə kifayətdir. Dərin dezinfeksiya (həftədə bir dəfə) üçün mütəxəssislər üç üsul tövsiyə edir: məhsulun üzərində icazə varsa, qabyuyan maşında yumaq, gecəboyu diş protezlərinin təmizlənməsi üçün olan tabletlə suda islatmaq və sirkə və ya xörək sodası məhlulundan istifadə etmək.
Əgər butulkanın içində gözlə görünən kif və ya yuyulduqdan sonra da getməyən köhnə, rütubətli qoxu hiss edilirsə, butulka dərhal utilizasiya edilməlidir.