Böyük Britaniya hökumətinin apardığı son araşdırma uşaqlarda ekran istifadəsi ilə danışıq bacarıqları arasında ciddi əlaqə olduğunu üzə çıxarıb.
“Tehsil365” xəbər verir ki, Araşdırma nəticələrinə görə, ekrana ən çox vaxt ayıran iki yaşlı uşaqların lüğət ehtiyatı nəzərəçarpacaq dərəcədə məhduddur və onlar yaşıdlarına nisbətən daha az söz ifadə edə bilirlər.
Ekspertlər valideynləri və tərbiyəçiləri xüsusilə erkən yaş dövründə uşaqların ekran qarşısında keçirdiyi vaxtı məhdudlaşdırmağa çağırırlar. Onların fikrincə, bu dövr uşağın dil, ünsiyyət və idrak bacarığının formalaşmasında həlledici mərhələdir və bu inkişaf prosesi ən çox canlı ünsiyyət və real təcrübə ilə dəstəklənməlidir.
Təhsil və uşaq inkişafı üzrə mütəxəssislər həmçinin vurğulayırlar ki, çox erkən yaşlarda ekrana məruz qalma təkcə danışıq deyil, həm də emosional və sosial bacarıqların zəifləməsinə səbəb ola bilər.
Araşdırmanın nəticələri ölkədə valideynlər və müəllimlər arasında narahatlıq doğurub və bu sahədə daha ciddi maarifləndirmə və tənzimləmə tədbirlərinin vacibliyini gündəmə gətirib.