Azərbaycan uşaq ədəbiyyatının görkəmli nümayəndələrindən olan şair Tofiq Mütəllim oğlu Mütəllibov 1929-cu il aprelin 13-də Naxçıvan şəhərində anadan olub. O, 1958–1963-cü illərdə Azərbaycan Dövlət Universitetində (indiki Bakı Dövlət Universiteti) ali təhsil alıb.
“Tehsil365” xatırladır ki, Tofiq Mütəllibovun ədəbi yaradıcılığa erkən yaşlarından başladığı bildirilir. Onun “Zəfər” adlı ilk şeiri 1946-cı ildə “Azərbaycan pioneri” qəzetində dərc olunub. Sonrakı illərdə “Pioner” jurnalında məsul katib, Televiziya və Radio Verilişləri Komitəsində redaktor və böyük redaktor, “Azərbaycan pioneri” qəzetində şöbə müdiri vəzifələrində çalışıb. Daha sonra “Azərbaycan gəncləri” qəzetində fəaliyyətə başlayan şair ömrünün sonunadək bu mətbu orqanda işləyib.
XX əsrin 50-ci illərindən şair kimi tanınan Tofiq Mütəllibov 30-a yaxın kitabın müəllifidir. Onun “Görüş”, “Şeirlər”, “Bəxtiyar balalar”, “Gözəllikdən doymur ürək”, “Sənin xətrinə”, “Danışan çiçəklər”, “Mənim əzizlərim”, “Görüş yerimiz” və digər kitabları oxucular tərəfindən rəğbətlə qarşılanıb. Şairin son kitabı “Sevənlərin ürəyi” ölümündən az əvvəl çap olunub.
Bildirilib ki, şair uşaqların psixologiyasını dərindən bildiyinə görə onun qələmindən çıxan şeirlər illərdir sevilərək oxunur. Tofiq Mütəllibovun müəllifi olduğu, məktəb mühitində baş verən sadə, lakin tərbiyəvi bir hadisəni əks etdirən aşağıdakı şeir də bu baxımdan diqqət çəkir:
Təbaşirə bulaşmışdı
Dilarənin saçı, üzü.
Arxayınca gəzirdi o,
Xəbərsizdi bundan özü.
Qəh-qəh çəkib gülüşdülər
Yoldaşları onu görcək.
Biri dedi: – Üzün ağdır,
Üstünə də təbaşir çək.
Biri dedi: – Nə gözəldir,
Nə qəşəngdir bu görkəmin.
Ağappaqsan, “Qar qız” olsun
Qoy bu gündən adın sənin.
Biri isə nə söz deyib,
Nə üzünə güldü onun.
Yaylığını çıxardaraq
Üz-gözünü sildi onun.
Qeyd olunur ki, bu şeir Tofiq Mütəllibovun uşaqlarda mərhəmət, nəzakət və empati hisslərini aşılamağa yönəlmiş yaradıcılığının bariz nümunələrindən biridir.
Xatırladaq ki, şair bəstəkar Qənbər Hüseynli ilə birgə Azərbaycan musiqisinə məşhur “Cücələrim” mahnısını bəxş edib. Bu mahnı bu gün də uşaqlar tərəfindən sevə-sevə ifa olunur və bir çox dillərə tərcümə edilib.
Görkəmli şair Tofiq Mütəllibov 1992-ci il oktyabrın 30-da vəfat edib.