Azərbaycan Dillər Universitetinin (ADU) Avropa dilləri kafedrasının pedaqoji elmlər doktoru, professor Dilarə İsmayılovanın “İkidilli Təhsil” adlı tədris vəsaiti çapdan çıxıb.
“Tehsil365” xəbər verir ki, tədris vəsaitinin elmi rəyçiləri Təhsil elmləri doktoru, dosent Firuzə A. Rzayeva və pedaqogika üzrə fəlsəfə doktoru, dosent Səbinə A. Hüseynovadır.
Nəşrdə ikidilli təhsilin nəzəri və metodoloji əsasları əhatə olunub. Tədris vəsaitində ikidilli təhsil anlayışı ana və ikinci dildə akademik məzmunun paralel şəkildə tədrisi kimi izah edilir, ikidillilik, çoxdillilik və translanqvizm anlayışlarının mahiyyəti müasir elmi yanaşmalar əsasında təqdim olunur.
“İkidilli Təhsil” adlı tədris vəsaiti altı əsas bölmədən ibarətdir. Buraya “İkidilli təhsil”, “Billingualizm”, “Translanqvizm”, “Çoxdillilik”, “Təhsildə orijinallıq” və “Təhsildə didaktika” bölmələri daxildir. Bölmələrdə ikidilli tədrisin məzmunu, metodları və praktik tətbiq imkanları sistemli şəkildə şərh edilir.
Vəsaitdə tələbələr arasında qarşılıqlı əlaqə vasitəsilə xarici dilin tədrisinin inkişaf etdirilməsi, orijinal tədris materiallarından istifadə, eləcə də müəllim və öyrənənlər üçün müxtəlif ikidilli metodların əhəmiyyəti xüsusi vurğulanır. Eyni zamanda, təhsildə didaktikanın planlaşdırma, icra və qiymətləndirmə mərhələləri ətraflı izah olunur.
Qeyd edək ki, “İkidilli Təhsil” tədris vəsaiti xarici dil müəllimləri, dil təhsili üzrə kursantlar, bakalavr və magistratura səviyyələrində təhsil alan tələbələr, həmçinin Tətbiqi Dilçilik, Pedaqogika və Linqvodidaktika sahəsində tədqiqat aparan mütəxəssislər üçün nəzərdə tutulub.
