“Tehsil365” İnformasiya Agentliyinin layihəsi olan “Şəhidin səsi” proqramının növbəti buraxılışı 20 Yanvar – Ümumxalq Hüzn Gününə həsr ediləcək.
“Tehsil365" xəbər verir ki, Veriliş 20 yanvar saat 18:00-da yayımlanacaq. Buraxılışın aparıcısı “Tehsil365” İnformasiya Agentliyinin icraçı direktoru Rəşanə Quliyevadır.
Qanlı 20 Yanvar faciəsindən 36 il ötür. Azərbaycan xalqının azadlıq, demokratiya və suverenlik uğrunda apardığı mübarizənin rəmzinə çevrilmiş bu faciə milli azadlıq hərəkatının müstəqilliyə doğru irəliləməsində həlledici dönüş nöqtəsi olub.
1990-cı il yanvarın 19-dan 20-nə keçən gecə sovet ordusunun Bakıya yeridilməsi nəticəsində dinc əhaliyə qarşı misli görünməmiş qırğın törədilib. Rəsmi məlumatlara əsasən, faciə zamanı 131 nəfər mülki şəxs həlak olub, 744 nəfər yaralanıb, 841 nəfər qanunsuz həbs edilib, yüzlərlə yaşayış binası və avtomobil yararsız hala salınıb.
Hadisələrdən dərhal sonra ümummilli lider Heydər Əliyev Moskvada Azərbaycan nümayəndəliyinə gələrək sovet rəhbərliyinin bu addımını insanlığa və demokratiyaya zidd cinayət kimi qiymətləndirib və günahkarların cəzalandırılmasını tələb edib. Məhz onun təşəbbüsü ilə 20 Yanvar faciəsinə ilk siyasi-hüquqi qiymət verilib, 1994-cü ildə Milli Məclisin qərarı ilə faciə dövlət səviyyəsində rəsmən tanınıb.
Bu gün Prezident İlham Əliyevin rəhbərliyi ilə 20 Yanvar şəhidlərinin xatirəsinin əbədiləşdirilməsi, onların ailələrinin sosial müdafiəsinin gücləndirilməsi istiqamətində mühüm addımlar atılır. Şəhid ailələri və müharibə əlilləri dövlətin daim diqqət və qayğısı ilə əhatə olunur.
Hər il yanvarın 20-də Azərbaycan xalqı şəhidlərin xatirəsini dərin ehtiramla yad edir. Bu il isə 20 Yanvar şəhidləri bütöv Azərbaycanın, Qalib ölkənin vətəndaşları kimi anılacaq. 2020-ci ildə Vətən müharibəsində qazanılan Zəfər şəhidlərimizin qisasının alındığını bir daha sübut edib.
Allah bütün şəhidlərə rəhmət eləsin. Onların əziz xatirəsi Azərbaycan xalqının qəlbində əbədi yaşayacaq.