Prezident İlham Əliyevin AMEA-nın 80 illik yubiley tədbirində səsləndirdiyi fikirlər, xüsusilə fundamental elmlərin daha da inkişaf etdirilməsinin vacibliyi barədə çağırışı bizim üçün strateji istiqaməti müəyyən edən mühüm mesajdır, institutumuz üçün yeni mərhələnin başlanğıcıdır.
Bu barədə “Tehsil365"ə Elm və Təhsil Nazirliyi Neft və Qaz İnstitutunun baş direktoru akademik Fəxrəddin Qədirov məlumat verib. O bildirib ki, Prezidentin bu yanaşması bir daha göstərir ki, ölkəmizin innovativ inkişaf modeli yalnız tətbiqi deyil, məhz güclü fundamental elmi bazaya söykənməlidir. Bu baxımdan Neft və Qaz İnstitutunun elmi prioritetlərinin yenilənməsi obyektiv bir zərurətdir.
Akademik qeyd edib ki, bu çağırışlar fonunda institut fundamental elmi istiqamətləri dərinləşdirməklə yanaşı, onların praktiki sferaya keçid mexanizmlərini də gücləndirməyi qarşısına məqsəd qoyub. Bu istiqamətdə geodinamikanın enerji sistemlərinə inteqrasiyası, yeni nəsil rəqəmsal modellərin hazırlanması, süni intellekt əsaslı analizlərin genişləndirilməsi, həmçinin strateji xarakterli fundamental tədqiqat layihələrinin icrası prioritet kimi müəyyənləşdirilib. Bu addımlar həm elmi nəticələrin qlobal səviyyədə tanınmasına, həm də ölkəmizin enerji siyasətinin elmi baxımdan dəstəklənməsinə real töhfə verəcək.
“Bundan başqa, geodinamika, geofizika, seysmik təhlükəsizlik, dərin quruluş tədqiqatları, neft-qaz sistemlərinin fundamental əsasları kimi istiqamətlər daha da gücləndirilməlidir. Bu sahələr həm enerji təhlükəsizliyi, həm də ölkəmizin geostrateji maraqları baxımından xüsusi əhəmiyyət kəsb edir. Çünki fundamental elmlərin inkişafı bizə geoloji proseslərin fizikasını daha dərindən anlamağa, neft-qaz yataqlarının təkamül mexanizmlərini daha dəqiq modelləşdirməyə və nəticə etibarilə ölkənin enerji strategiyasını elmi əsaslarla dəstəkləməyə imkan verəcək”,- deyə alim bildirib.