15 yanvar 2026-cı il tarixdə Qax rayon Tasmalı kənd Elçin Şahmərdanov adına tam orta ümumtəhsil məktəbində Məktəb Kiçik Akademiyası xətti ilə Azərbaycan dili fənni üzrə kiçik bilik yarışı təşkil olunub.
"Tehsil365" xəbər verir ki, Bilik yarışının keçirilməsində məqsəd şagirdlərin Azərbaycan dili üzrə bilik və bacarıqlarının artırılması, onların məntiqi düşünmə, sərbəst fikir yürütmə və sağlam rəqabət mühitində özlərini sınamaq imkanlarının genişləndirilməsi olub. Yarışda məktəbin müxtəlif siniflərini təmsil edən şagirdlər fəal iştirak ediblər.
Müsabiqə zamanı şagirdlərə dil qaydaları, leksik və qrammatik biliklər, eləcə də mətnlə iş üzrə tapşırıqlar təqdim olunub. İştirakçılar verilən suallara yüksək maraq və həvəslə cavab verərək öz biliklərini nümayiş etdiriblər.
Yarışın sonunda fərqlənən şagirdlər məktəb rəhbərliyi və təşkilatçılar tərəfindən təqdir olunub, onlara gələcək fəaliyyətlərində uğurlar arzulanıb. Tədbir şagirdlərin Azərbaycan dilinə marağının artırılması və elmi-bilik mühitinin formalaşdırılması baxımından əhəmiyyətli olub.