Yanvarın 19-da Azərbaycan Dillər Universitetində (ADU) 20 Yanvar faciəsinin 36-cı ildönümünə həsr olunmuş “Milli istiqlal tariximizin zirvəsi” adlı anım tədbiri keçirilib.
Bu barədə “Tehsil365”ə universitetdən məlumat verilib. Bildirilib ki, tədbir Azərbaycan Respublikasının Dövlət Himninin səsləndirilməsi ilə başlayıb, 20 Yanvar şəhidlərinin əziz xatirəsi bir dəqiqəlik sükutla yad edilib.
Tədbirdə çıxış edən Beynəlxalq münasibətlər və regionşünaslıq fakültəsinin dekanı, professor İbrahim Kazımbəyli 20 Yanvar faciəsinin tarixinə nəzər salaraq, bu qanlı hadisənin baş vermə səbəblərindən və onun xalqımızın azadlıq mübarizəsində tutduğu mühüm yerdən danışıb.
ADU-nun rektoru, akademik Kamal Abdulla bildirib ki, 20 Yanvar ümumxalq hüznü təkcə müəyyən bir günlə məhdudlaşmır, bu ağrı hər gün xalqın yaddaşında yaşayır. O vurğulayıb ki, şəhidlərin xatirəsinin daim yaşadılması cəmiyyətin mənəvi gücünü artırır, milli birlik və həmrəyliyi möhkəmləndirir. Rektor qeyd edib ki, xalqın çaşqınlıq içində olduğu bir dövrdə Ümummilli lider Heydər Əliyev Azərbaycanın haqq səsini dünya ictimaiyyətinə çatdıraraq sovet rəhbərliyini bu faciəyə görə açıq şəkildə ittiham edib. Akademik Kamal Abdulla əlavə edib ki, Azərbaycan xalqı sınmayıb, diz çökməyib və öz taleyinin sahibi olduğuna inanaraq müstəqillik yolunda qətiyyət göstərib. Bu gün ölkəmizin qazandığı uğurların da həmin inamın nəticəsi olduğu diqqətə çatdırılıb.
Daha sonra 20 Yanvar hadisələrinə həsr olunmuş videoçarx nümayiş etdirilib.
Tədbirdə AMEA-nın müxbir üzvü, professor Könül Bünyadzadə “Müstəqil Azərbaycan ideyasının doğulması, inkişafı və reallaşması” mövzusunda məruzə ilə çıxış edərək 20 Yanvar faciəsinin dövlətçilik tariximizdəki xüsusi rolundan bəhs edib.
Qafqazşünaslıq və Azərbaycan tarixi kafedrasının müəllimi Zərifə Əliyeva “20 Yanvar – milli yaddaş və tarixi məsuliyyət” mövzusunda çıxışında bu faciənin xalqın kollektiv yaddaşında silinməz iz buraxdığını vurğulayıb.
Beynəlxalq münasibətlər kafedrasının müəllimi, dosent Aysel Bağırova isə “20 Yanvar faciəsi – ikiqütblü sistemdən yeni beynəlxalq münasibətlər sisteminə keçid kontekstində” mövzusunda məruzə ilə çıxış edib.
Filologiya fakültəsinin tələbəsi Ülkər Əsgərova “20 Yanvar – azadlığın qanla qazanılmış səhifəsi” mövzusunda çıxış edərək gənc nəslin bu tarixi hadisələrdən düzgün nəticə çıxarmasının vacibliyini qeyd edib.
Tədbirin sonunda iştirakçılar 20 Yanvar şəhidlərinin xatirəsinin daim ehtiramla anılmasının milli-mənəvi dəyərlərin qorunması və gələcək nəsillərə ötürülməsi baxımından xüsusi əhəmiyyət daşıdığını bildiriblər.
