Bu gün Azərbaycanda 1990-cı il yanvarın 20-də baş vermiş Qara Yanvar faciəsindən 36 il keçir. Həmin tarix Azərbaycan xalqının yaddaşına Ümumxalq Hüzn Günü kimi həkk olunub.
“Tehsil365” xatırladır ki, 1990-cı il yanvarın 19-dan 20-nə keçən gecə SSRİ rəhbərliyinin qərarı ilə sovet ordusunun çoxsaylı hərbi hissələri Bakıya yeridilib. Fövqəladə vəziyyət elan olunmasına baxmayaraq, bu qərar əhaliyə əvvəlcədən bildirilməyib. Nəticədə şəhərə daxil olan tanklar, zirehli maşınlar və silahlı hərbi qulluqçular dinc sakinlərə qarşı ağır silahlardan istifadə ediblər.
Faciə nəticəsində müxtəlif mənbələrə görə 131-dən 170-dək mülki şəxs həlak olub, 700-dən çox insan yaralanıb, yüzlərlə vətəndaş isə qanunsuz olaraq həbs edilib. Ölən və yaralananlar arasında qadınlar, uşaqlar və yaşlılar da olub. Həmin gecə yaşayış binalarına, nəqliyyat vasitələrinə və şəhər infrastrukturuna ciddi ziyan dəyib.
Qara Yanvar faciəsi zamanı Azərbaycanda informasiya blokadası yaradılıb. Televiziya və radio mərkəzlərinin enerji təminatı partladılıb, mətbuatın fəaliyyəti dayandırılıb. Məqsəd baş verən hadisələr barədə həqiqi məlumatların ölkə daxilində və beynəlxalq aləmdə yayılmasının qarşısını almaq olub.
Bu qanlı hadisələr SSRİ rəhbərliyinin Azərbaycan xalqının milli azadlıq hərəkatını boğmaq məqsədilə həyata keçirdiyi hərbi-siyasi terror aktı kimi qiymətləndirilir. Qara Yanvar insan hüquqlarının, demokratiya və humanizm prinsiplərinin kobud şəkildə pozulmasının bariz nümunəsi hesab olunur.
Faciədən sonra Azərbaycan xalqı bütün təzyiqlərə baxmayaraq azadlıq iradəsindən geri çəkilməyib. Əksinə, Qara Yanvar hadisələri milli birlik və müstəqillik əzmini daha da gücləndirib və bu mübarizə 1991-ci ildə Azərbaycanın dövlət müstəqilliyinin bərpası ilə nəticələnib.
1994-cü ildə Milli Məclisin qəbul etdiyi qərarla 20 Yanvar faciəsinə dövlət səviyyəsində hüquqi-siyasi qiymət verilib. Həmin qərarla hadisənin günahkarları açıq şəkildə göstərilib, faciə qurbanlarının xatirəsinin əbədiləşdirilməsi istiqamətində mühüm addımlar atılıb.
Hər il yanvarın 20-si Azərbaycanda Ümumxalq Hüzn Günü kimi qeyd olunur. Bu gün ölkənin bütün bölgələrində şəhidlərin xatirəsi dərin ehtiramla anılır, insanlar Şəhidlər xiyabanını ziyarət edir, dövlət bayraqları yarıyadək endirilir.
