Yanvarın 19-da Azərbaycan Dillər Universitetinin (ADU) Fransız dilinin fonetikası və qrammatikası kafedrasının əməkdaşları tərəfindən 20 Yanvar faciəsinin 36-cı ildönümünə həsr olunmuş “20 Yanvar – Qan yaddaşımız” adlı dəyirmi masa təşkil olunub.
Bu barədə “Tehsil365”ə universitetdən məlumat verilib. Bildirilib ki, tədbirdə Azərbaycanın ərazi bütövlüyü, xalqımızın azadlığı və dövlətimizin müstəqilliyi uğrunda canlarından keçmiş şəhidlərin xatirəsi bir dəqiqəlik sükutla yad edilib.
Dəyirmi masa kafedra müdiri, filologiya üzrə fəlsəfə doktoru, dosent Vəfa Seyidin giriş sözü ilə açılıb. O, qeyd edib ki, Azərbaycan tarixinə Qanlı Yanvar hadisələri kimi daxil olmuş 20 Yanvar faciəsindən 36 il ötür. Bildirilib ki, 1987-ci ilin sonlarından etibarən yenidən gündəmə gətirilmiş qondarma Dağlıq Qarabağ problemi Azərbaycanın ərazi bütövlüyünün pozulmasına, torpaqlarımızın işğalına, Ermənistanda və Dağlıq Qarabağda yaşayan yüz minlərlə azərbaycanlının öz doğma yurd-yuvalarından didərgin salınmasına yönəlib.
Vurğulanıb ki, Azərbaycan xalqının haqq-ədalətin bərpası uğrunda səsini ucaltdığı bir vaxtda Sovet hakimiyyəti misli görünməmiş cinayətə əl atıb. 1990-cı il yanvarın 19-dan 20-nə keçən gecə SSRİ rəhbərliyi beynəlxalq hüquq normalarını və mövcud qanunvericiliyi kobud şəkildə pozaraq, əhalini xəbərdar etmədən Bakıda və ölkənin digər bölgələrində qırğın törədib. Nəticədə 146 nəfər öldürülüb, 744 nəfər yaralanıb, 841 nəfər isə qanunsuz olaraq həbs edilib. Qeyd olunub ki, bu qanlı hadisədən bir gün sonra – yanvarın 21-də ümummilli lider Heydər Əliyev Azərbaycanın Moskvadakı Daimi Nümayəndəliyinə gələrək SSRİ rəhbərliyinin törətdiyi bu cinayəti kəskin şəkildə pisləyib və beynəlxalq ictimaiyyət qarşısında qətiyyətli bəyanatla çıxış edib.
Tədbirdə çıxış edən kafedranın müəllimi Aynurə Cəbiyeva bildirib ki, 20 Yanvar Azərbaycan tarixində təkcə faciə deyil, eyni zamanda milli azadlıq hərəkatının zirvəsi, xalqımızın istiqlal arzularının oyanış günü kimi tarixə düşüb. Qeyd edilib ki, sovet imperiyası günahsız insanların qanını axıtsa da, milli iradəni sındıra bilməyib və bu hadisə imperiyanın əsl mahiyyətini ifşa edib.
Kafedranın baş müəllimi Sücəddin Əyyublu isə qeyd edib ki, 20 Yanvar hadisəsi ağrı-acı ilə xatırlansa da, milli oyanışın, azadlıq və müstəqillik mübarizəsinin rəmzi kimi tariximizə həkk olunub. Bildirilib ki, xalqımız uzun illər daxili və xarici təzyiqlərə mətinliklə sinə gərərək nəhayət bir yumruq kimi birləşib və müstəqilliyini tam bərpa edib.
Tədbirin sonunda dosent Vəfa Seyid çıxış edərək vurğulayıb ki, bu il xalqımız 20 Yanvar faciəsinin 36-cı ildönümünü dərin ehtiramla qeyd edir. O, Şəhidlər xiyabanının Vətən uğrunda canlarından keçmiş igid oğul və qızlarımızın uyuduğu müqəddəs məkan olduğunu bildirib və şəhidlərimizin azadlığımızın, müstəqilliyimizin və milli iradəmizin əbədi rəmzi olduğunu diqqətə çatdırıb.
