1990-cı il yanvarın 19-dan 20-nə keçən gecə Azərbaycan tarixinin ən faciəli səhifələrindən biri yaşandı.
“Tehsil365” xəbər verir ki, Saat 23:30 radələrində keçmiş Sovet İttifaqının silahlı qoşun hissələri fövqəladə vəziyyət elan edilmədən Bakı şəhərinə yeridildi və dinc əhaliyə qarşı ağır hərbi əməliyyatlar həyata keçirildi.
Tanklar və zirehli texnika ilə şəhərə daxil olan qoşunlar qadın, uşaq və yaşlı demədən mülki şəxslərə atəş açdı. Nəticədə yüzlərlə insan həlak oldu, çox sayda vətəndaş yaralandı, itkin düşənlər oldu. Dinc əhalinin azadlıq və müstəqillik tələbləri qan içində boğuldu.
Sovet rəhbərliyinin bu addımı insan hüquqlarının kobud şəkildə pozulması və Azərbaycan xalqına qarşı törədilmiş ağır cinayət kimi qiymətləndirilir. Qara Yanvar faciəsi xalqın iradəsini qıra bilmədi, əksinə, müstəqillik uğrunda mübarizəni daha da gücləndirdi.
20 Yanvar hadisələri Azərbaycan xalqının azadlıq yolunda verdiyi qanlı, lakin şərəfli qurbanların rəmzi olaraq tarixə həkk olundu. Bu gün şəhidlərin xatirəsi ehtiramla anılır, faciə qurbanları milli yaddaşda daim yaşayır.